ഈ വർഷം ഓസ്ട്രേലിയയിൽ നടക്കാനിരിക്കുന്ന ടന്റി 20 ലോകകപ്പിനുള്ള ഇന്ത്യൻ ടീമിൽ ഒരു സർപ്രൈസ് താരമുണ്ടാകുമെന്ന് ഇന്ത്യൻ നായകൻ വിരാട് കോഹ്ലി കഴിഞ്ഞ ദിവസം സൂചന നൽകിയിരുന്നു. ഒപ്പം പ്രസിദ് കൃഷ്ണ എന്ന യുവതാരം അഭ്യന്തര മത്സരങ്ങളിൽ മികച്ച പ്രകടനം പുറത്തെടുക്കുന്നുണ്ടെന്നും കോഹി ലി പറഞ്ഞിരുന്നു. പിന്നാലെ പ്രസിദ് കൃഷ്ണ ആരാണ് എന്ന ചോദ്യം ഗൂഗിളിൽ അന്വേഷിക്കാൻ തുടങ്ങി ക്രിക്കറ്റ് ആരാധകർ.
ഐപിഎല്ലിൽ കൊൽക്കത്ത നൈറ്റ് റൈഡേഴ്സ് ബൗളറാണ് പ്രസിദ് കൃഷ്ണ എന്ന 24 വയസുകാരൻ. ആഭ്യന്തര ക്രിക്കറ്റിൽ മികച്ച പ്രകടനം പുറത്തെടുക്കുന്ന പ്രസിദ് ഐപിഎല്ലിലും മികച്ച ഫോമിലാണ്. ഇക്കഴിഞ്ഞ വിജയ് ഹസാരെ ട്രോഫിയിൽ 8 മത്സരങ്ങളിൽ നിന്ന് 17 വിക്കറ്റുകളാണ് താരം വീഴ്ത്തിയത്. 18 ഐപിഎൽ മത്സരങ്ങളിൽ നിന്ന് 14 വിക്കറ്റുകളും സ്വന്തമാക്കിയിട്ടുണ്ട്.
ഐപിഎൽ അടക്കം ആകെ 28 ട്വന്റി20 മത്സരങ്ങളാണ് താരം കളിച്ചിട്ടുള്ളത്. 28 ഇന്നിംഗ്സുകളിൽ നിന്നായി 24 വിക്കറ്റുകൾ നേടിയിട്ടുണ്ട്. 30 റൺസ് വഴങ്ങി നാല് വിക്കറ്റ് വീഴ്ത്തിയതാണ് മികച്ച ബൗളിംഗ് പ്രകടനം. ഫസ്റ്റ് ക്ലാസ് ക്രിക്കറ്റിൽ 6 മത്സരങ്ങളിൽ നിന്ന് 20 വിക്കറ്റും ലിസ്റ്റ് എ യിൽ 41 മത്സരങ്ങളിൽ നിന്ന് 67 വിക്കറ്റുകളും താരം സ്വന്തമാക്കിയിട്ടുണ്ട്.
ശ്രീലങ്കയ്ക്കെതിരായ രണ്ടാം ട്വന്റി20യ്ക്ക് ശേഷമുള്ള പ്രസന്റേഷൻ സമയത്താണ് സർപ്രൈസ് താരത്തെക്കുറിച്ച് കോഹ് ലി പറഞ്ഞത്. തനിക്ക് തോന്നുന്നത് ഓസ്ട്രേലിയയിലേക്ക് പോകുമ്പോൾ ഒരു താരം സർപ്രൈസ് പാക്കേജായിരിക്കുമെന്നതാണ്. അത് മികച്ച പേസിലും ബൗൺസിലും പന്തെറിയാൻ കഴിവുള്ള താരമാകണം. പ്രസിദ് കൃഷ്ണ അഭ്യന്തര മത്സരങ്ങളിൽ മികച്ച പ്രകടനമാണ് പുറത്തെടുക്കുന്നതെന്നുമായിരുന്നു കോഹ്ലി പറഞ്ഞത്.
