കൊച്ചി: പാമ്പിന് വിഷം ഉപയോഗിക്കാതെ വിഷചികിത്സയ്ക്കുള്ള ആന്റിവെനം തയ്യാറാക്കാന് പുതിയ കണ്ടുപിടിത്തവുമായി ജീനോമിക്സ് കമ്പനികള്. ആഗ്രിജീനോം ലാബ്സ് ഇന്ത്യ, സൈജിനോം റിസര്ച്ച് ഫൗണ്ടേന് എന്നിവയുടെ ശാസ്ത്രജ്ഞരാണ് പുതിയ കണ്ടുപിടുത്തം നടത്തിയത്. ഇന്ത്യന് മൂര്ഖന്റെ വിഷത്തിന്റെ ജനിതക ഘടന കൃത്യമായി മനസിലാക്കിയാണ് ശാസ്ത്രജ്ഞര് സിന്തറ്റിക് ആന്റിവെനങ്ങള് നിര്മ്മിച്ചെടുക്കാനുള്ള വഴിയൊരുക്കിയത്. ജീനുകള് എന്കോഡ് ചെയ്ത പ്രോട്ടീനുകളുടെ സങ്കീര്ണമായ മിശ്രിതമാണ് പാമ്പിന് വിഷം. വിഷഗ്രന്ഥികളില് പ്രതിഫലിക്കുന്ന 19 വിഷ ജീനുകളെയാണ് ശാസ്ത്രജ്ഞര് വേര്തിരിച്ചെടുത്തത്.
നേച്ചര് ജനറ്റിക്സാണ് ഇത് സംബന്ധിച്ച റിപ്പോര്ട്ട് പ്രസിദ്ധീകരിച്ചത്. കൃത്രിമമായി നിര്മ്മിച്ചെടുക്കുന്ന ഹ്യൂമന് ആന്റിബോഡികള് ഉപയോഗിച്ച് ഈ 19 വിഷവസ്തുക്കളെ ലക്ഷ്യം വെയ്ക്കുന്നത് വഴി സുരക്ഷിതവും ഫലപ്രദവുമായ ഈ ആന്റിവെനം നിര്മ്മിക്കാന് സാധിക്കുമെന്നാണ് ജനിതക പഠനത്തിന് നേതൃത്വം നല്കിയ എസ്ജിആര്എഫ് പ്രസിഡന്റ് ഡോ. ചന്ദ്രശേഖര് ശേഷഗിരി പറയുന്നത്.
നിലവില് ആന്റിവെനം നിര്മ്മിക്കുന്നത് പാമ്പില് നിന്നും ശേഖരിച്ച വിഷം ഉപയോഗിച്ച് കുതിരകളില് ആന്റിബോഡി വികസിപ്പിച്ച് അത് ശുദ്ധീകരിച്ചാണ്. 1895 ല് ഫ്രഞ്ച് ശാസ്ത്രജ്ഞരായ ആല്ബര്ട്ട് കാല്മറ്റ് വികസിപ്പിച്ചെടുത്ത രീതിയെ അടിസ്ഥാനമാക്കിയുള്ളതാണിത്. ഈ മരുന്നുകള്ക്ക് ഫലപ്രാപ്തി കുറവും പാര്ശ്വഫലങ്ങള് കൂടുതലുമാണ്. എന്നാല് ആന്റിവെനം വികസിപ്പിച്ചെടുക്കുന്ന രീതിയെ പൂര്ണമായും മാറ്റുന്നതാണ് പുതിയ ശാസ്ത്ര നേട്ടമെന്നാണ് അഗ്രിജീനോം ലാബ്സ് ചീഫ് ഓപ്പറേറ്റിംഗ് ഓഫീസര് ജോര്ജ് തോമസ് പറയുന്നത്.
