ന്യൂഡല്ഹി: നിര്ഭയ കേസില് വിനയ് കുമാര് ശര്മ്മയ്ക്കു പിന്നാലെ പ്രതി മുകേഷും വധശിക്ഷയ്ക്കെതിരെ സുപ്രീം കോടതിയില് തിരുത്തല് ഹര്ജി സമര്പ്പിച്ചു. കേസിലെ അമിക്കസ് ക്യൂറിയായ അഭിഭാഷകന് വൃന്ദാ ഗ്രോവറാണ് മുകേഷിന് വേണ്ടി തിരുത്തല് ഹര്ജി സമര്പ്പിച്ചത്.
പ്രതികളുടെ മരണ വാറണ്ട് ഡല്ഹി അഡീഷണല് സെഷന്സ് കോടതി പുറപ്പെടുവിച്ചതിന് പിന്നാലെയാണ് പ്രതികള് തിരുത്തല് ഹര്ജി സമര്പ്പിച്ചത്. വധശിക്ഷ സ്റ്റേ ചെയ്യണമെന്നാവശ്യപ്പെട്ടാണ് മുകേഷ് ഹര്ജി സമര്പ്പിച്ചത്. പ്രതികളെ ജനുവരി 22-ന് രാവിലെ ഏഴു മണിക്ക് തൂക്കിലേറ്റാനാണ് കോടതി വിധിച്ചത്.
മുകേഷിന് മുമ്പ് കേസിലെ പ്രതി വിനയ് ശര്മ്മ തിരുത്തല് ഹര്ജി സമര്പ്പിച്ചിരുന്നു. ജസിക്കാലാല് കൊലക്കേസിലെ പ്രതി മനു ശര്മ്മയ്ക്ക് ജീവപര്യന്തം നല്കിയത് ചൂണ്ടിക്കാട്ടിയാണ് വിനയ് സിങ് ശര്മ്മ ഹര്ജി സമര്പ്പിച്ചത്. വധശിക്ഷാ നിയമത്തില് ഇന്ത്യയില് ഒട്ടേറെ മാറ്റങ്ങള് വന്നിട്ടുണ്ട്. സമാനമായ പല പീഡന കൊലപാതക കേസുകളിലും വധശിക്ഷ നല്കിയിരുന്നില്ലെന്നും ശര്മ്മ ഹര്ജിയില് ചൂണ്ടിക്കാട്ടിയിരുന്നു.
പ്രായപൂര്ത്തിയാകാത്ത ഒരാള് ഉള്പ്പെടെ ആറു പേരാണ് നിര്ഭയ കേസിലെ പ്രതികള്. ഒന്നാം പ്രതി രാംസിങ് വിചാരണക്കിടെ ജയിലില് ജീവനൊടുക്കിയിരുന്നു. പ്രായ പൂര്ത്തിയാവാത്തതിനാല് മറ്റൊരാളെ മൂന്നു വര്ഷത്തെ തടവ് ശിക്ഷയ്ക്ക് ശേഷം കോടതി വിട്ടയച്ചിരുന്നു.
2012 ഡിസംബര് 16-നാണ് നിര്ഭയ പെണ്കുട്ടി ക്രൂരമായ പീഡനത്തിനിരയായത്. തുടര്ന്ന് വിദഗ്ദ്ധ ചികിത്സയ്ക്ക് സിംഗപൂരില് കൊണ്ടു പോയിരുന്നെങ്കിലും ഡിസംബര് 29-ന് മരിക്കുകയായിരുന്നു. കൃത്യം നടന്ന് ഏഴു വര്ഷത്തിന് ശേഷമാണ് കേസില് അന്തിമ വിധി പ്രഖ്യാപിച്ചത്.
