ജിദ്ദ : സ്പാനിഷ് ലീഗിലെ കരുത്തരായ ബാഴ്സയെ നിര്ണ്ണായക സെമിയില് ഞെട്ടിച്ച് അത്ലറ്റിക്കോ മാഡ്രിഡ് സൂപ്പര് കപ്പിന്റെ ഫൈനലില് പ്രവേശിച്ചു. അവസാന നിമിഷങ്ങളില് നേടിയ ഗോളില് 3-2നാണ് അത്ലററികോയുടെ ജയം. ഞായറാഴ്ച നടക്കുന്ന ഫൈനലില് അറേബ്യന് മണ്ണിലെ ജിദ്ദയില് അത്ലറ്റികോ ഇനി റയല് മാഡ്രിഡിനോട് കിരീടത്തിനായി പോരാടും.
വലിയ മുന്നേറ്റം കാണാതിരുന്ന ആദ്യപകുതിക്ക് ശേഷമാണ് ഇരു ടീമുകളും ആക്രമണ ഫുട്ബോളിലേക്ക് കടന്നത്. എന്നാലും ബാഴ്സയായിരുന്നു പന്ത് കൈവശം വക്കുന്നതില് വിജയിച്ചത്. രണ്ടാം പകുതിയുടെ തുടക്കത്തില് 46-ാം മിനിറ്റില് അത്ലറ്റികോ കോക്കിന്റെ ഗോളിലൂടെ മുന്നിലെത്തി. എന്നാല് സൂപ്പര് താരം മെസ്സിയുടെ മുന്നേറ്റം 5 മിനിറ്റിനുള്ളില് ബാഴ്സ ആരാധകരെ ആവേശത്തിലാക്കി. 51-ാം മിനിറ്റില് മെസ്സിയുടെ മൂന്ന് പ്രതിരോധ താരങ്ങളെ മറികടന്നുള്ള സമനില ഗോള് പിറന്നു. ബാഴ്സയുടെ ക്ലാസ്സ് പ്ലേ കണ്ട മറ്റൊരു ഗോളിലൂടെ 62-ാം മിനിറ്റില് ഗ്രീസ്മാന് ടീമിനെ 2-1ന് മുന്നിലെത്തിച്ചു.
കളി പ്രതിരോധത്തിനിടെ ഫൗളുകളിലേക്കും നീങ്ങിയതോടെ കിട്ടിയ 81-ാം മിനിറ്റിലെ പെനാല്റ്റി അത്ലറ്റികോ പാഴാക്കിയില്ല. ബാഴ്സയെ നിരാശരാക്കി അല്വാറോ മൊറാറ്റാ പെനാല്റ്റി ഗോളാക്കി ടീമിന് 2-2ന്റെ നിര്ണ്ണായക സമനില നല്കി. ഫൈനല് കാണാതെ മടങ്ങാമെന്ന സൂചന നല്കി ആന്ഞ്ചെല് കൊറയയുടെ ഞെട്ടിക്കുന്ന 86-ാം മിനിറ്റിലെ ഗോള് സൂപ്പര് കപ്പില് ബാഴ്സയുടെ കിരീട പ്രതീക്ഷ കെടുത്തി.
