മുംബൈ: ഫെബ്രുവരിയില്‍ഓസ്‌ട്രേലിയയില്‍ നടക്കാനിരിക്കുന്ന ടി20 വനിതാ ലോകകപ്പ് ക്രിക്കറ്റിനായുള്ള ഇന്ത്യന്‍ ടീമിനെ പ്രഖ്യാപിച്ചു. ബാറ്റിംഗ് പ്രതിഭയായ ഹര്‍മന്‍പ്രീത് കൗര്‍ ടീമിനെ നയിക്കും. 15 അംഗ ടീമില്‍ റിച്ചാ ഘോഷിന് ദേശീയ ടീമിലേക്ക് ആദ്യ അവസരവുമൊരുങ്ങിക്കഴിഞ്ഞു. കഴിഞ്ഞ ചലഞ്ചര്‍ ട്രോഫിയില്‍ നാലു ഫോറും ഒരു സിക്‌സറുമടക്കം 26 പന്തുകളില്‍ 36 റണ്‍സെടുത്ത് ഘോഷ് മികച്ച പ്രകടനം നടത്തിയിരുന്നു.
ഫെബ്രുവരി 21ന് നടക്കുന്ന ഉദ്ഘാടന മത്സരത്തില്‍ ആതിഥേയരായ ഓസ്‌ട്രേലിയയാണ് ആദ്യ എതിരാളി. ഇന്ത്യക്ക് പുറമേ ബംഗ്ലാദേശ്, ന്യൂസിലാന്റ്, ശ്രീലങ്ക എന്നിവരാണ് ഒരു ഗ്രൂപ്പിലുള്ളത്. രണ്ടു ഗ്രൂപ്പിലേയും ആദ്യ രണ്ട് സ്ഥാനക്കാര്‍ സെമിഫൈനലിലെത്തുന്ന രീതിയില്‍ത്തന്നെയാണ് മത്സരങ്ങള്‍ തീരുമാനിച്ചിരിക്കുന്നത്.
ടീം: ഹര്‍മന്‍ പ്രീത് കൗര്‍, സ്മൃതി മന്ഥാന, ഷെഫാലീ വെര്‍മ, ജെമീയ റോഡ്രിഗ്‌സ്, ഹര്‍ലീന്‍ ഡിയോള്‍, ദീപ്തി ശര്‍മ, വേദ കൃഷ്ണമൂര്‍ത്തി, റിച്ചാ ഘോഷ്, പൂനം യാദവ്, രാധാ യാദവ്,രാജേശ്വരി ഗെയ്‌ക്ക് വാദ്, ശിഖാ പാണ്ഡേ, പൂജാ വസ്ത്രാകാര്‍, അരുന്ധതി റെഡ്ഡി, നുസ്ഹത് പര്‍വീണ്‍ എന്നിവരാണ് ടീമിലുള്ളത്.
