ന്യൂഡല്ഹി: ആകാശ സുരക്ഷയില് 200 യുദ്ധവിമാനങ്ങള് കൂടി ചേര്ത്തുകൊണ്ട് വ്യോമസേന ശക്തിയാര്ജ്ജിക്കുന്നു. ഇന്ത്യന് കമ്പനിയായ ഹിന്ദുസ്ഥാന് എയറോനോട്ടിക്കല് ലിമിറ്റഡിന്റെ 83 എല്സിഎ തേജസ് മാര്ക്ക് 1 എ വിഭാഗത്തില്പ്പെട്ട ആധുനിക വിമാനങ്ങളാണ് വ്യോമസേനയുടെ ഭാഗമാകുന്നത്.
ഇന്ത്യയിലെ അതിര്ത്തി പ്രദേശങ്ങളും കടല് സുരക്ഷയുമുള്പ്പടെ ശക്തമാക്കുന്നതിന്റെ ഭാഗമായി വിവിധ കേന്ദ്രങ്ങളില് വിന്യസിക്കാന് കൂടുതല് വിമാനങ്ങള് ആവശ്യമാണെന്ന നിര്ദ്ദേശം പ്രതിരോധ മന്ത്രാലയത്തിന് സമര്പ്പിച്ചതായി പ്രതിരോധ സെക്രട്ടറി അജയ്കുമാര് സ്ഥിരീകരിച്ചു.
‘തങ്ങള് നിലവില് 83 ലൈറ്റ് കോംബാറ്റ് എയര്ക്രാഫ്റ്റ് വിഭാഗത്തിലുള്ളവക്ക് കരാര് കൊടുത്തുകഴിഞ്ഞു.രൂപകല്പനകളും മറ്റ് സാങ്കേതിക കാര്യങ്ങളും മുന്നേ തന്നെ തീരുമാനിച്ചു കഴിഞ്ഞു. ഒരു വര്ഷം 8 മുതല് 16 വരെ വിമാനങ്ങള് നിര്മ്മിച്ച് കൈമാറും.കൂടുതല് സംവിധാനം ഒരുക്കേണ്ട ആവശ്യത്തിന് പുറംകരാര് നല്കാനും വ്യവസ്ഥയുണ്ട്.’ ഡിഫന്സ് സെക്രട്ടറി പറഞ്ഞു.
വ്യോമസേനക്ക് നിലവില് സുഖോയ് 30, മിറാഷ് 2000, മിഗ് 29, ജാഗ്വാര്, മിഗ്21 എന്നിവയാണ് നിലവില് വ്യോമസേനയുടെ ഭാഗമായുള്ളത്. മിഗ് 27 വിഭാഗമാണ് കഴിഞ്ഞ ഡിസംബറോടെ പൂര്ണ്ണമായും പിന്വലിച്ചത്.