ബാഴ്സലോണ: സ്പാനിഷ് സൂപ്പര് കപ്പിലെ തോല്വി അവസരമാക്കി ബാഴ്സലോണ, മുഖ്യപരിശീലകന് ഏണസ്റ്റോ വാല്വെര്ദേയെ പുറത്താക്കി. പകരക്കാരനായി ഉടനെ തന്നെ മുന് റയല്ബെറ്റിസ് ക്ലബ്ബിന്റെ പരിശീലകന് ക്വികെ സെറ്റിയനെ നിയമിക്കുകയും ചെയ്തു.
കഴിഞ്ഞ രണ്ടര വര്ഷമായി ബാഴ്സലോണയുടെ പരിശീലകനായി തുടരുകയായിരുന്നു 55 കാരനായ വാല്വെര്ദേ. മുന് പരിശീലകന് ലൂയി എന്റിക്വെക്ക് പകരമായിട്ടാണ്
വാല്വെര്ദേ ബാഴ്സവോണയുടെ പരിശീലകനാകുന്നത്. 2017ല് ബാഴ്സയില് തുടങ്ങിയ ദൗത്യം പക്ഷെ സൂപ്പര് കപ്പില് ടീം മാനേജ്മെന്റിന്റെ പ്രതീക്ഷകളെ കെടുത്തിയതിനാലാണ് പുറത്തായത്. എന്നാല് മോശപ്പെട്ട റെക്കോഡല്ല വാല്വാര്ദേക്ക് ബാഴ്സക്കൊപ്പമുള്ളത്.
രണ്ടു തവണ ലീഗ് കിരീടവും ഒരു തവണ സൂപ്പര് കപ്പും ഈ രണ്ടര വര്ഷത്തിനിടെ ബാഴ്സ സ്വന്തം പേരില് ചേര്ത്തുകഴിഞ്ഞു. എന്നാല് ചാമ്പ്യന്സ് ലീഗിലെ പുറത്താകല് ബാഴ്സ ക്ലബ്ബ് മാനേജ്മെന്റിന് ചങ്കില്ക്കൊള്ളുന്നതായി. ഒരു തവണ ലിവര്പൂളിനോടും പിന്നീട് എ. എസ്. റോമയോടും തോറ്റ ബാഴ്സ വന് നാണക്കേടിലായതിന്റെ പഴിപേറിയ വാല്വാര്ദേ, ദാ ഇപ്പോ സൂപ്പര് കപ്പില് തോറ്റതോടെ ബലിയാടായി.
പകരക്കാരനായി വന്നിരിക്കുന്ന സെറ്റിയന് സ്പെയിനിന്റെ മുന് ദേശീയ താരമാണ്. സെറ്റിയനെ ആരാധകര്ക്കായി ഇന്ന് രാത്രി പരിചയപ്പെടുത്തുമെന്നാണ് ബാഴ്സ ടീം അറിയിച്ചിട്ടുള്ളത്. പരിശീലന രീതിയില് ബാഴ്സ തന്ത്രങ്ങള് തന്നെ പയറ്റുന്ന താരമാണ് സെറ്റിയനെന്ന 61കാരന്. ഈ സീസണില് ലാ ലീഗയില് ഒന്നാം സ്ഥാനത്ത് നിലയുറപ്പിച്ചിരിക്കുന്ന ബാഴ്സ ചാമ്പ്യന്സ് ലീഗില് 16-ാം സ്ഥാനത്താണെന്നതാണ് വെല്ലുവിളി. നാപ്പോളിയുമായി ക്വാര്ട്ടറില് കളിച്ചുകൊണ്ട് ചാമ്പ്യന്സ് ലീഗിന്റെ മുന് നിരയിലേക്ക് കിരീടത്തിനായി ഇനി സെറ്റിയന്റെ തന്ത്രങ്ങളാണ് തുണയാകുക.