അഹമ്മദാബാദ്: രാജ്‌കോട്ടില്‍ നാളെ നടക്കാനിരിക്കുന്ന ഇന്ത്യാ- ഓസ്‌ട്രേലിയ രണ്ടാം ഏകദിനത്തില്‍ പരിക്കേറ്റ വിക്കറ്റ് കീപ്പര്‍ ബാറ്റ്‌സ്മാന്‍ ഋഷഭ് പന്തിനെ ഒഴിവാക്കി.തലക്കേറ്റ പരിക്ക് സംബന്ധിച്ച് ഡോക്ടര്‍മാരുടെ അനുവാദം കിട്ടാത്തതിനാലാണ് പന്തിനെ ഒഴിവാക്കുന്നത്. കഴിഞ്ഞ കളിയില്‍ പന്തിന്റെ അഭാവത്തില്‍ വിക്കറ്റ് കീപ്പിംഗ് ഏറ്റെടുത്ത കെ.എല്‍.രാഹുല്‍ തന്നെ തുടരുമെന്നാണറിവ്.
ആദ്യ ഏകദിനത്തില്‍ ഇന്ത്യയെ പന്തുകൊണ്ടും ബാറ്റുകൊണ്ടും നിഷ്പ്രയാസം ഒതുക്കിയ ഓസ്‌ട്രേലിയന്‍ നിര മികച്ച ആത്മവിശ്വാസത്തിലാണ്. ബാറ്റിംഗില്‍ ഇന്ത്യയുടെ മധ്യനിരയെ കൃത്യമായ ഇടവേളകളില്‍ പുറത്താക്കാനായതിന്റെ സന്തോഷത്തിലാണ് ഓസീസ് പേസ് നിരയിലെ കമ്മിന്‍സും സ്റ്റാര്‍ക്കും. ഇന്ത്യന്‍ പിച്ചില്‍ കിട്ടിയ മുന്‍തൂക്കം രാജ്‌കോട്ടിലും രക്ഷയാകുമെന്ന വിശ്വാസത്തിലാണ് ഓസീസ് പേസ് നിര. ബാറ്റിംഗില്‍ വാര്‍ണറും ഫിഞ്ചും ഇന്ത്യയെ അമ്പരപ്പിച്ച് നേടിയ ജയം ഇന്ത്യയുടെ ബൗളിംഗിന്റേയും ഫീല്‍ഡിങ്ങിന്റേയും പിഴവു മുതലാക്കിയായിരുന്നുവെന്ന് കോഹ്‌ലി കളികഴിഞ്ഞയുടനെ പറഞ്ഞിരുന്നു.
കോഹ്‌ലി രാഹുലിനായി നാലാം നമ്പറിലേക്ക് ഇറങ്ങിക്കളിച്ചതിനെതിരെ മുന്‍താരങ്ങളുടെ വിമര്‍ശനവും പുറത്തുവന്നിരുന്നു. ഏതു പൊസിഷനിലും രാഹുല്‍ മിടുക്കനാണ്. എന്നാല്‍ ഇന്ത്യന്‍ നായകന്‍ മൂന്നാം നമ്പറായി തന്നെ ഇറങ്ങണമെന്നതില്‍ ഒരു സംശയവും വേണ്ടെന്ന നിലപാടിലാണ് സീനിയര്‍ താരങ്ങള്‍.പന്തിന്റെ സ്ഥാനത്തേക്ക് കേദാര്‍ ജാദവിനെ കൊണ്ടുവരുമെന്നാണറിവ്. ബൗളിംഗ് നിര പുതിയ പിച്ചില്‍ മികവ് കാട്ടുമെന്നാണ് പ്രതീക്ഷയെന്നും രവിശാസ്ത്രി പറഞ്ഞു.
