രാജ്കോട്ട്: ഇന്ത്യ-ഓസ്ട്രേലിയ പരമ്പരയിലെ രണ്ടാം ഏകദിനം ഇന്ന് രാജ്കോട്ടില് നടക്കും. ഉച്ചതിരിഞ്ഞ് 1.30നാണ് മത്സരം നടക്കുക. ആദ്യ മത്സരത്തില് പരാജയപ്പെട്ട ഇന്ത്യക്ക് പരമ്പര കൈവിടാതിരിക്കാന് ഇന്നത്തെ മത്സരം ഏറെ നിര്ണായകമാണ്.
പരിക്കേറ്റ വിക്കറ്റ് കീപ്പര് ബാറ്റ്സ്മാന് ഋഷഭ് പന്തിനെ രണ്ടാം ഏകദിനത്തില് നിന്ന് ഒഴിവാക്കിയിട്ടുണ്ട്. കഴിഞ്ഞ കളിയിലേതിന് സമാനമായി കെ.എല്.രാഹുല് തന്നെ വിക്കറ്റ് കീപ്പറായി തുടരാനാണ് സാധ്യത. പന്തിനു പകരം കേദാര് ജാദവ് ടീമിലെത്തിയേക്കും. ഇതിനിടെ കോഹ്ലി നാലാം നമ്പറിലേക്ക് ഇറങ്ങിക്കളിച്ചതിനെതിരെ മുന്താരങ്ങളുടെ വിമര്ശനവും പുറത്തുവന്നിരുന്നു. ഏതു പൊസിഷനിലും രാഹുല് മികവു പ്രകടിപ്പിക്കാറുണ്ട്. എന്നാല് ഇന്ത്യന് നായകന് മൂന്നാം നമ്പറില് തന്നെ ഇറങ്ങണമെന്ന ആവശ്യം ശക്തമാണ്. ബൗളിംഗ് നിര പുതിയ പിച്ചില് മികവ് കാട്ടുമെന്നാണ് പ്രതീക്ഷയെന്ന് കോച്ച് രവിശാസ്ത്രി ആത്മവിശ്വാസം പ്രകടിപ്പിച്ചു.
ആദ്യ ഏകദിനത്തില് ഇന്ത്യയെ പന്തുകൊണ്ടും ബാറ്റുകൊണ്ടും നിഷ്പ്രയാസം ഒതുക്കിയ ഓസ്ട്രേലിയന് നിര മികച്ച ആത്മവിശ്വാസത്തിലാണ്. ആദ്യ മത്സരത്തില് ലഭിച്ച മുന്തൂക്കം രാജ്കോട്ടിലും രക്ഷയാകുമെന്ന വിശ്വാസത്തിലാണ് ഓസീസ് പേസ് നിര. ബാറ്റിംഗില് വാര്ണറും ഫിഞ്ചും ഇന്ത്യയെ അമ്പരപ്പിച്ച് നേടിയ 10 വിക്കറ്റ് ജയം ഇന്ത്യയുടെ ബൗളിംഗിന്റേയും ഫീല്ഡിങ്ങിന്റേയും പിഴവു മുതലാക്കിയായിരുന്നുവെന്ന് കോഹ്ലി മത്സര ശേഷം പ്രതികരിച്ചിരുന്നു.
