രാജ്കോട്ട്: ഇന്ത്യൻ ഓപ്പണർ ഹിറ്റ് മാൻ രോഹിത് ശർമ്മയ്ക്ക് മറ്റൊരു നേട്ടം കൂടി. സച്ചിൻ, ഗാംഗുലി, സേവാഗ് എന്നിവർക്കൊപ്പം എലൈറ്റ് ലിസ്റ്റിലെത്തിയിരിക്കുകയാണ് രോഹിത്. മൂവർ സംഘത്തിന് ശേഷം ഏകദിനത്തിൽ ഓപ്പണറായി ഏഴായിരം റൺസ് തികക്കുന്ന താരമായിമാറിയിരിക്കുകയാണ് ഹിറ്റ്മാൻ. ഓസ്ട്രേലിയയ്ക്കെതിരായ രണ്ടാം ഏകദിനത്തിലാണ് താരം നേട്ടം സ്വന്തമാക്കിയത്.
മത്സരത്തിൽ 44 പന്തിൽ നിന്ന് 42 റൺസെടുത്ത രോഹിത്തിന് നാല് റൺസ് അകലെ മറ്റൊരു നേട്ടം നഷ്ടമായി. 9000 ക്ലബ്ബിലെത്താനുള്ള അവസരമാണ് താരത്തിന് നഷ്ടമായത്. നിലവിൽ 216 ഇന്നിംഗ്സുകളിൽ നിന്നായി 8996 റൺസാണ് രോഹിത്തിന്റെ സമ്പാദ്യം.
തകർപ്പൻ ഫോമിലുള്ള രോഹിത് ഒരു കലണ്ടർ വർഷത്തിൽ ഏറ്റവുമധികം സെഞ്ച്വറികൾ പൂർത്തിയാക്കുന്ന രണ്ടാമത്തെ താരമായി മാറിയിരുന്നു. ഏഴ് സെഞ്ച്വറികൾ നേടിയ സച്ചിന്റെ റെക്കോഡിനൊപ്പമായിരുന്നു രോഹിത് എത്തിയത്. ഇതിനൊപ്പം പോയവർഷം ഏകദിനത്തിൽ ഏറ്റവുമധികം റൺസ് നേടിയ രണ്ടാമത്തെ താരമെന്ന റെക്കോഡും സ്വന്തമാക്കിയ രോഹിത് ഐസിസിയുടെ 2019ലെ ഏകദിന ക്രിക്കറ്റർ ഓഫ് ദ ഇയർ പുരസ്കാരത്തിനും അർഹനായിരുന്നു.
