റഷ്യയിലെ മോസ്കോ കാഴ്ച്ച ബംഗ്ലാവില് നിന്നുള്ള ഒരു ദൃശ്യമാണ് ഇപ്പോള് വൈറലാകുന്നത്. മഞ്ഞില് കളിച്ചു രസിക്കുന്ന ഡിംഗ് ഡിംഗ് പാണ്ടയുടെ ദൃശ്യങ്ങളാണ് മോസ്കോ കാഴ്ച്ച ബംഗ്ലാവ് പുറത്തു വിട്ടിരിക്കുന്നത്. വെറുമൊരു പാണ്ടയല്ല ഡിംഗ് ഡിംഗ്. റഷ്യന് പ്രസിഡന്റ് വ്ളാഡിമര് പുടിന് ചൈനീസ് പ്രസിഡന്റ് ഷി ജിന് പിംഗ് നല്കിയ സമ്മാനമാണ് ഡിംഗ് ഡിംഗ് എന്ന പാണ്ടക്കുഞ്ഞ്.
2019 ഏപ്രില് മാസത്തില് ഇരുവരും ഒരു ചടങ്ങില് പങ്കെടുത്തിരുന്നു. ആ കൂടിക്കാഴ്ച്ച കഴിഞ്ഞ് മടങ്ങുമ്പോഴാണ് ഷി ജിന് പിംഗ് പുടിന് ഡിംഗ് ഡിംഗിനെ സമ്മാനിക്കുന്നത്. പുടിന് ഡിംഗ് ഡിംഗിനെ മോസ്കോ കാഴ്ച്ച ബംഗ്ലാവിലേക്ക് സംഭാവന ചെയ്തു. ഡിംഗ് ഡിംഗ് എന്ന പാണ്ട ലോകശ്രദ്ധ ആകര്ഷിക്കാനുള്ള കാരണം ഇതാണ്.
മഞ്ഞില് പുതഞ്ഞു കിടക്കുന്ന മോസ്കോ കാഴ്ച്ച ബംഗ്ലാവില് കളിച്ചു രസിക്കുകയാണ് ഡിംഗ് ഡിംഗ്. മഞ്ഞുകൂമ്പാരത്തിലെ ക്രിസ്തുമസ് ട്രീയില് വലിഞ്ഞു കയറാന് നോക്കിയും മഞ്ഞില് ഉരുണ്ടു കളിച്ചുമൊക്കെ ആര്ത്തുല്ലസിക്കുകയാണ് അവള്. ക്രിസ്തുമസ് ട്രീയില് വലിഞ്ഞു കയറാന് ശ്രമിക്കുന്നതിനിടെ മരമൊടിഞ്ഞ് ഡിംഗ് ഡിംഗ് താഴെ വീഴുന്നതും ദൃശ്യങ്ങളില് ഉണ്ട്. താഴെ വീണെങ്കിലും അവളുടെ വികൃതിയ്ക്ക് ഒരു കുറവും ഉണ്ടായിരുന്നില്ല. ഒടിഞ്ഞ ശിഖരവുമായി മഞ്ഞിലുരുണ്ട് പിന്നെയും രസിക്കുകയാണ് ഡിംഗ് ഡിംഗ്.