ടെസ്റ്റ് ക്രിക്കറ്റിന്റെ ചരിത്രത്തില് ഇടംനേടിയ അപൂര്വ്വ സംഭവത്തിന് ഇന്ന് 20 വയസ്. ഒരിക്കല് മാത്രം സംഭവിച്ച, ഇനി സംഭവിക്കാന് സാധ്യത കുറവുള്ള അപൂര്വ്വ മത്സരമായയിരുന്നു ഇംഗ്ലണ്ടും ദക്ഷിണാഫ്രിക്കയും തമ്മില് നടന്നത്. രണ്ട് ടീമുകളും ഓരോ ഇന്നിംഗ്സുകള് വീതം പൂജ്യം റണ്സിന് ഡിക്ലയര് ചെയ്തതായിരുന്നു മത്സരത്തിന്റെ പ്രത്യേകത.
ജനുവരി 14ന് ആരംഭിച്ച മത്സരത്തില് ദക്ഷിണാഫ്രിക്കയാണ് ആദ്യം ബാറ്റ് ചെയ്തത്. 6 വിക്കറ്റ് നഷ്ടത്തില് 155 റണ്സെന്ന നിലയിലാണ് ദക്ഷിണാഫ്രിക്ക ഒന്നാം ദിനം കളി അവസാനിപ്പിച്ചത്. തുടര്ന്ന് രണ്ട്, മൂന്ന്, നാല് ദിവസങ്ങളില് മഴ കാരണം മത്സരം നടന്നില്ല. ഇതിനു പിന്നാലെയാണ് അഞ്ചാമത്തേയും അവസാനത്തേയും ദിനം ചരിത്രമായത്.
അഞ്ചാം ദിനം കളി തുടങ്ങുന്നതിന് മുന്പ് ദക്ഷിണാഫ്രിക്കന് നായകന് ഹാന്സി ക്രോണിയും ഇംഗ്ലണ്ട് നായകന് നാസര് ഹുസൈനും കണ്ടുമുട്ടി. ഇരുവരും ഓരോ ഇന്നിംഗ്സ് വീതം ഡിക്ലയര് ചെയ്യാന് തീരുമാനിച്ചു. ഇതേ തുടര്ന്ന് ദക്ഷിണാഫ്രിക്ക ഒന്നാം ഇന്നിംഗ്സ് 8 വിക്കറ്റ് നഷ്ടത്തില് 248 റണ്സില് അവസാനിപ്പിച്ചു.
ക്രിക്കറ്റില് ഒന്നാം ഇന്നിംഗ്സ് ഉപേക്ഷിക്കാന് കഴിയാത്തതിനാല് ഇംഗ്ലണ്ട് റണ്സെടുക്കാതെ ഇന്നിംഗ്സ് ഡിക്ലയര് ചെയ്തു. ഇതോടെ ദക്ഷിണാഫ്രിക്ക രണ്ടാം ഇന്നിംഗ്സ് ഉപേക്ഷിച്ചു. അങ്ങനെ ഇംഗ്ലണ്ടിന്റെ വിജയലക്ഷ്യം 249 റണ്സായി മാറി. രണ്ട് വിക്കറ്റ് ബാക്കി നിര്ത്തി മത്സരം ഇംഗ്ലണ്ട് വിജയിച്ചു.