ലണ്ടന്‍: 23 മത്സരങ്ങള്‍ കഴിഞ്ഞതോടെ പ്രീമിയര്‍ ലീഗില്‍ ലിവര്‍പൂള്‍ 64 പോയിന്റുകളുമായി ഒന്നാം സ്ഥാനത്ത് എതിരാളികളില്ലാതെ ബഹുദൂരം മുന്നിലാണ്. തോറ്റെങ്കിലും മാഞ്ചസ്‌ററര്‍ യുണൈറ്റഡ് അഞ്ചാം സ്ഥാനത്തുണ്ട്. മാഞ്ചസ്റ്റര്‍ സിറ്റി 48ഉം ലെസ്റ്റര്‍ സിറ്റി 45ഉം പോയിന്റുകളോടെ രണ്ടും മൂന്നും സ്ഥാനത്താണുള്ളത്. 39 പോയിന്റുള്ള ചെല്‍സി നാലാമതും അഞ്ചാം സ്ഥാനത്തുള്ള മാഞ്ചസ്റ്റര്‍ യുണൈറ്റഡിന് 34പോയിന്റാണുള്ളത്.
ടോട്ടനം 8-ാംസ്ഥാനത്തും ആഴ്‌സണല്‍ 10-ാം സ്ഥാനത്തുമാണ്.
പ്രീമിയര്‍ ലീഗിലെ 23-ാം ദിനത്തിലെ കളിയിലും ലിവര്‍പൂള്‍ വിജയക്കുതിപ്പ് തുടരുന്നു. വമ്പന്മാരുടെ പോരാട്ടത്തില്‍ ലിവര്‍പൂള്‍ എതിരില്ലാത്ത രണ്ടു ഗോളുകള്‍ക്കാണ് മാഞ്ചസ്റ്റര്‍് യുണൈറ്റഡിനെ തോല്‍പ്പിച്ചത്.രണ്ടാം മത്സരത്തില്‍ ബേണ്‍ലീ ലെസ്റ്ററിനെ ഞെട്ടിച്ചു.
തോല്‍വിയറിയാതെ മുന്നേറുന്ന ലിവര്‍പൂള്‍ എല്ലാ അര്‍ത്ഥത്തിലും യുണൈറ്റഡിനെ വീഴ്‌ത്തി. എതിരാളികളുടെ വലയിലേക്ക് 16 ഷോട്ടുകള്‍ പായിച്ചാണ് ലിവര്‍പൂള്‍ ആക്രമിച്ചുകയറിയത്. 14-ാം മിനിറ്റില്‍ വാന്‍ ഡിക്കിന്റെ വകയായിരുന്നു ആദ്യ ഗോള്‍. തുടര്‍ന്ന് യുണൈറ്റഡ് പ്രതിരോധം ശക്തമാക്കുകയും പലതവണ മുന്നേറിയിട്ടും ഗോളടിക്കാനായില്ല. കളിയുടെ അവസാനം ലഭിച്ച അധികസമയത്ത് 93-ാം മിനിറ്റില്‍ മുഹമ്മദ് സല കിട്ടിയ അവസരം മുതലാക്കി രണ്ടാം ഗോളിലൂടെ മാഞ്ചസ്റ്ററിന്റെ തോല്‍വി ഉറപ്പിച്ചു.
രണ്ടാം മത്സരത്തില്‍ 3-ാം സ്ഥാനത്തുള്ള ലെസ്റ്ററിനെ ഞെട്ടിച്ച് 14-ാം സ്ഥാനത്തുളള ബേണ്‍ലി ഒന്നിനെതിരെ രണ്ടു ഗോളിന്റെ അപ്രതീക്ഷിത ജയം നേടി. ഹാര്‍വേ ബാര്‍ണെസിലൂടെ 33-ാം മിനിറ്റില്‍ നേടിയ മുന്‍തൂക്കം ലെസ്റ്റര്‍ കളഞ്ഞുകുളിച്ചു. രണ്ടാം പകുതിയില്‍ ആക്രമിച്ച് കളിച്ച ബേണ്‍ലീ താരങ്ങള്‍ 56-ാം മിനിറ്റില്‍ ക്രിസ് വുഡിലൂടെ സമനില പിടിച്ചു. വീണ്ടു ആക്രമണം തുടര്‍ന്ന ബേണ്‍ലിക്ക് 79-ാം മിനിറ്റിലാണ് വിജയഗോളിന്റെ അവസരം ഒത്തുവന്നത്. ആഷ്‌ലീ വെസ്റ്റവുഡാണ് ലെസ്റ്ററിന്റെ വല ചലിപ്പിച്ചത്.
