ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ യുണൈറ്റഡിന് അപ്രതീക്ഷിത തോല്‍വി. ബേണ്‍ലി എതിരില്ലാത്ത രണ്ടു ഗോളുകള്‍ക്കാണ് യുണൈറ്റഡിനെ ഞെട്ടിച്ചത്. മറ്റു രണ്ടുമത്സരങ്ങളില്‍ ലെസ്റ്റര്‍ സിറ്റി വെസ്‌ററ് ഹാമിനെ ഒന്നിനെതിരെ നാലു ഗോളുകള്‍ക്ക് തകര്‍ത്തുവിട്ടപ്പോള്‍ ടോട്ടനം ഒന്നിനെതിരെ രണ്ടുഗോളുകള്‍ക്ക് നോര്‍വിച്ച് സിറ്റിയെ പരാജയപ്പെടുത്തി.
കളിയുടെ ഇരുപകുതികളിലായിട്ടാണ് ബേണ്‍ലി മാഞ്ചസ്റ്റര്‍ യുണൈറ്റഡിന്റെ വല ചലിപ്പിച്ചത്. 39-ാം മിനിറ്റില്‍ ക്രിസ് വുഡാണ് ബേണ്‍ലിക്കായി ആദ്യ ഗോള്‍ നേടിയത്. ആദ്യപകുതിയില്‍ ഭൂരിഭാഗം സമയം പന്ത് കൈവശം വച്ചിട്ടും ചെമ്പടക്ക് ഗോളടിക്കാനായില്ല. രണ്ടാം പകുതിയില്‍ കിട്ടിയ അടുത്ത അവസരവും ബേണ്‍ലി ഭംഗിയായി ഉപയോഗിച്ചു. ജെയ് റോഡ്രിഗസാണ് രണ്ടാം ഗോള്‍ നേടിയത്. ആകെ 690 പാസ്സുകളിലൂടെ കളംനിറഞ്ഞിട്ടും മാഞ്ചസ്റ്റര്‍ ആരാധകരെ നിരാശരാക്കി. 24 ഷോട്ടുകള്‍ പായിച്ചതില്‍ 7 എണ്ണം ഗോള്‍ ലക്ഷ്യമാക്കിയിട്ടായിരുന്നു. എന്നാല്‍ മികച്ച പ്രതിരോധം തീര്‍ത്തും കിട്ടിയ അവസരത്തില്‍ മുന്നേറിയും ബേണ്‍ലി പ്രീമിയര്‍ ലീഗിലെ മികച്ച കളി പുറത്തെടുത്തു.
ലെസ്റ്റര്‍ സിറ്റി ഏയോസെ പെരസിന്റെ ഇരട്ടഗോളുകളുടെ മികവിലാണ് വെസ്റ്റ്ഹാമിനെതിരെ 4-1ന്റെ തകര്‍പ്പന്‍ ജയം നേടിയത്. കളിയുടെ 24-ാം മിനിറ്റില്‍ ഹാര്‍വേ ബേണസാണ് ലെസ്റ്ററിന്റെ ആദ്യ ഗോള്‍നേടിയത്. തുടര്‍ന്ന് ആദ്യ പകുതിയുടെ അധികസമയത്തെ 5-ാം മിനിറ്റില്‍ റിക്കാഡോ പെരേര രണ്ടാം ഗോള്‍ നേടി. എന്നാല്‍ മാര്‍ക്ക് നോബിളിലൂടെ രണ്ടാം പകുതിയുടെ ആദ്യമിനിറ്റില്‍ വെസ്റ്റഹാമിനായി ഏക ഗോള്‍ നേടി. കളിയുടെ അവസാന പത്തുമിനിറ്റില്‍ രണ്ടു ഗോളുകളും കൂടി പിറന്നു. അയോസേ പെരസാണ് ലെസ്‌റററിന്‍രെ കരുത്ത് പുറത്തെടുത്ത് ഇരട്ട ഗോളുകള്‍ നേടിയത്. 81-ാം മിനിറ്റില്‍ ടീമിനായി മൂന്നാം ഗോള്‍ പെനാല്‍റ്റിയിലൂടെ നേടിയപ്പോള്‍ 88-ാം മിനിറ്റില്‍ നാലാം ഗോളും നേടി.
മൂന്നാം മത്സരത്തില്‍ ടോട്ടനം നോര്‍വെച്ചിനെ തോല്‍പ്പിച്ചത് 2-1നാണ്. 38-ാം മിനിറ്റില്‍ ഡെലെ അലിയുടെ ഗോളിലാണാ ടോട്ടനം ലീഡ് നേടിയത്. എന്നാല്‍ രണ്ടാം പകുതിയില്‍ 70-ാം മിനിറ്റില്‍ നോര്‍വിച്ചിനായി തീമു പുക്കി സമനിലഗോള്‍ നേടി. എന്നാല്‍ സുണ്‍ ഹ്യൂങ്ങ് മിന്നിന്റെ ഗോളിലൂടെയാണ് ടോട്ടനം 79-ാം മിനിറ്റില്‍ വിജയം പിടിച്ചെടുത്തത്.
