മാങ്ങയും ചക്കയും തേങ്ങയുമൊക്കെ പറിക്കാനായി മതിലു ചാടിക്കടക്കുന്ന മനുഷ്യരെ നാം കണ്ടിട്ടുണ്ട്. എന്നാല് മാമ്പഴം തേടി മതിലു ചാടിക്കടക്കുന്ന ആനയെ നിങ്ങള് കണ്ടിട്ടുണ്ടോ. പ്രിയങ്കരമായ ഭക്ഷണത്തിനായി മതിലു ചാടിക്കടക്കുന്ന ആനയുടെ ദൃശ്യങ്ങളാണ് ഇപ്പോള് സമൂഹ മാദ്ധ്യമങ്ങളിലെ ചര്ച്ചാ വിഷയം. സാംബിയയിലെ സൗത്ത് ലുങ്ക്വാ നാഷണല് പാര്ക്കിലാണ് സംഭവം. അഞ്ചടിയോളം ഉയരമുളള മതിലാണ് ആന ചാടിക്കടന്നത്. മുന്കാലുകള് ഉയര്ത്തി അതീവ ശ്രദ്ധയോടെയായിരുന്നു ആനയുടെ മതിലു ചാട്ടം.
മുഫേ ലോഡ്ജിലെ വിനോദ സഞ്ചാരികളാണ് ആന മതില് ചാടുന്നത് കണ്ടത്. ലോഡ്ജിന്റെ മാനേജിംഗ് ഡയറക്ടറായ ആന്ഡി ഹോഗാണ് മാമ്പഴം തിരഞ്ഞ് മതിലു ചാടിക്കടന്ന് ലോഡ്ജിന് അരികിലെത്തിയ ദൃശ്യങ്ങള് പകര്ത്തിയത്. മാമ്പഴം അന്വേഷിച്ചാണ് എത്തിയതെങ്കിലും സീസണ് അല്ലാത്തതിനാല് ആനയ്ക്ക് മാമ്പഴം ഒന്നും ലഭിച്ചില്ല.
മാവിന് ചുവട്ടിലെത്തി ചുറ്റാകെ മാമ്പഴം തെരഞ്ഞെങ്കിലും അവസാനം ഒന്നും കിട്ടാതെ നിരാശനായി വന്ന വഴിയേ തന്നെ മതിലു ചാടിക്കടന്ന് ആന മടങ്ങുകയും ചെയ്തു. വീഡിയോ ഇതിനോടകം തന്നെ ജനശ്രദ്ധ ആകര്ഷിച്ചു കഴിഞ്ഞു. മാമ്പഴം ലഭിച്ചില്ലെങ്കിലും എല്ലാവരുടെ പ്രിയങ്കരനായി മാറിയിരിക്കുകയാണ് ഈ ആന.
