ക്യാന്സറിനെ ആത്മവിശ്വാസം കൊണ്ട് നേരിട്ട് ജീവിച്ചു കാണിച്ചു തന്ന ചെറുപ്പക്കാരനാണ് നന്ദു മഹാദേവ. ക്യാന്സര് ബാധിച്ച് ഒരു കാല് മുറിച്ചു മാറ്റേണ്ടി വന്നിട്ടും ഇപ്പോഴും രോഗത്തോട് പോരാടുകയാണ് നന്ദു. ക്യാന്സര് ബാധിച്ചാല് ജീവിതം അവസാനിച്ചു എന്ന് കരുതുന്നവര്ക്ക് വീണ്ടും ജീവിതത്തിലേക്ക് തിരികെ എത്താന് കഴിയുന്ന തരത്തിലുള്ള പ്രചോദനകരമായ ഒട്ടേറെ അനുഭവങ്ങള് നന്ദു സമൂഹത്തോട് പങ്കുവെയ്ക്കാറുണ്ട്. അത്തരത്തിലൊരു കഥയാണ് നന്ദു തന്റെ ഫേസ്ബുക്ക് കുറിപ്പിലൂടെ പങ്കുവെച്ചിരിക്കുന്നത്. ക്യാന്സറിനെ തോല്പ്പിച്ചു വിവാഹിതരായ നക്ഷത്രക്കണ്ണുള്ള രാജകുമാരിയുടെയും രാജകുമാരന്റെയും കഥ.
നീതു വേദ്കിരണ് എന്നാണ് ആ രാജകുമാരിയുടെ പേര്. യൗവ്വനകാലത്ത് പിടികൂടിയ ക്യാന്സറിനെ കീമോ കൊണ്ടും റേഡിയേഷന് കൊണ്ടും പൊരുതി തോല്പ്പിച്ച നീതുവിന്റേയും ഭര്ത്താവ് വേദ്കിരണിന്റേയും ഒന്നാം വിവാഹ വാര്ഷികമാണിന്ന്. താന് ക്യാന്സര് സര്വൈവര് ആണെന്ന് തുറന്നു പറയാനുള്ള ധൈര്യം കാണിച്ച നീതുവിന് സഹതാപം കൊണ്ട് തന്നെ ആരും സ്നേഹിക്കരുതെന്നും നിര്ബന്ധമുണ്ടായിരുന്നു. നീതുവിനെ ആത്മാര്ത്ഥമായി സ്നേഹിച്ചു കൊണ്ടു അവളുടെ ജീവിതത്തിലേക്ക് കടന്നുവന്നയാളാണ് വേദ്കിരണ്.
സന്തോഷത്തോടെ സ്നേഹത്തോടെ ഒരുമിച്ചു ജീവിക്കുന്ന ഇവരുടെ മുന്നില് ക്യാന്സര് രോഗം തോറ്റു തുന്നം പാടി. ഒരായിരം പേര്ക്ക് ആത്മവിശ്വാസം നല്കാന് ഇവരുടെ രണ്ടാളുടെയും മുഖത്ത് കാണുന്ന ആ ചിരിയ്ക്ക് കഴിയും. എല്ലാത്തിനെയും തോല്പ്പിച്ചു നീതുവിനെ ചേര്ത്ത് പിടിക്കാന് മനസ്സ് കാണിച്ച വേദിന് അഭിവാദ്യം അര്പ്പിക്കുകയാണ് നന്ദു. മരുന്നിനെക്കാളും ഗുണം ചെയ്യും ഇതുപോലുള്ള ചേര്ത്ത് പിടിക്കലുകള്. കൂട്ടിനു ഞാനുണ്ട് അല്ലേല് ഞങ്ങളുണ്ട് എന്ന വാക്കുകള്. ഒരുപാട് കാലം സന്തോഷത്തോടെ സ്നേഹത്തോടെ ജീവിതം ഇങ്ങനെ ചേര്ത്ത് പിടിച്ചു മുന്നോട്ടു പോകാന് ഈശ്വരന് ഇവരെ അനുഗ്രഹിക്കട്ടെയെന്നും നന്ദു ആശംസിക്കുന്നു.
ഈ വിവാഹ വാർഷികം ഒക്കെയാണ് നമ്മൾ ആഘോഷിക്കേണ്ടത് !!ഇതൊരപൂർവ്വ കഥയാണ്..!ക്യാൻസറിനെ തോൽപ്പിച്ചു വിവാഹിതരായ…
Posted by Nandu Mahadeva on Friday, January 24, 2020