ചെന്നൈ: മഹേന്ദ്രസിംഗ് ധോണി പാഡ് അഴിക്കാന് തീരുമാനിക്കുന്ന നിമിഷം ഇന്ത്യന് ക്രിക്കറ്റിന് വന് നഷ്ടമായിരിക്കുമെന്ന് മുന് ഇന്ത്യന് നായകനും ക്രിക്കറ്റ് ഇതിഹാസവുമായ കപില് ദേവ് അഭിപ്രായപ്പെട്ടു. ഇന്ത്യക്കായി കപില് ദേവ് 1983ല് ആദ്യ ക്രിക്കറ്റ് ലോകകപ്പ് നേടിത്തന്ന നായകനാണ് കപില്ദേവ്. അതിന് ശേഷം 2007ലെ ടി20 ലോകകപ്പും ഏകദിനത്തിലെ 2011ലെ ലോകകപ്പും നേടി ഇന്ത്യന് ക്രിക്കറ്റിനെലോകത്തിന്റെ തലപ്പത്തെത്തിച്ച നായകനാണ് ഝാര്ഖണ്ഡ്കാരനായ മഹേന്ദ്ര സിംഗ് ധോണി.
‘ഇന്ത്യക്കായി ധോണി ഏറ്റവും മികച്ച സേവനമാണ് നടത്തിയത്. അദ്ദേഹത്തെ പോലെ പരിശ്രമിച്ചവരാരും ഇല്ല. എല്ലാവരും എന്നെങ്കിലും ഒരിക്കല് വിരമിക്കേണ്ടവരാണ്. ധോണി നിലവില് കളിക്കുന്നുമില്ല. അതിനാല്ത്തന്നെ എന്നാണദ്ദേഹം പുറത്തേക്ക് വന്ന് കളി മതിയാക്കുകയാണെന്ന് പറയുക എന്നതാണ് താന് ഉറ്റുനോക്കുന്നത്. ഇത്രക്കും ഉജ്ജ്വലനായ ഒരു ലോകക്രിക്കറ്ററെ നഷ്ടപ്പെടുക എന്നത് കനത്ത നഷ്ടമായിരിക്കും.’ കപില് ദേവ് മാധ്യമങ്ങളോടായി പറഞ്ഞു.
ബിസിസിഐയുടെ ഏറ്റവും പുതിയ കരാര് പട്ടികയില് ധോണി ഉള്പ്പെടാതിരുന്നപ്പോള് മുതല് ധോണിയുടെ വിരമിക്കലിനെപ്പറ്റിയുള്ള ചര്ച്ച ഉയരുകയാണ്. ധോണി കരാറില് ഉള്പ്പെടുത്താതിരുന്നതില് കപില് ദേവ് തന്റെ വിയോജിപ്പ് പ്രകടിപ്പിക്കുകയും ചെയ്തു. അദ്ദേഹത്തെ ഉള്പ്പെടുത്താ തിരുന്നതില് താനേറെ ദു: ഖിക്കുന്നു. സച്ചിനും ഗവാസ്ക്കറും ഇതേ അവസ്ഥ കടന്നു വന്നവരാണ്. ഇതില് ഇടപെടേണ്ട ആളും ഞാനല്ല. ചോദ്യങ്ങള് ക്രിക്കറ്റ് ബോര്ഡിനോടാണ് ചോദിക്കേണ്ടത്.മാധ്യമ പ്രവര്ത്തകരുടെ ചോദ്യത്തിന് ഉത്തരം തരേണ്ടത് അവരാണ് ‘ കപില് മറുപടി നല്കി.
38 കാരനായ ധോണിയുടെ സ്ഫോടനാത്മകമായ ബാറ്റിംഗിന്റേയും റണ്സിനായുള്ള ശക്തമായ ഓട്ടവും അവസാനിക്കുകയാണെന്നാണ് സമീപ കാലത്തെ കളികള് സൂചിപ്പിക്കുന്നത്.കഴിഞ്ഞ ലോകകപ്പിലെ നിര്ണ്ണായക മത്സരത്തില് ന്യൂസിലാന്റിനെതിരെ നിര്ഭാഗ്യകരമായി റണ്ണൗട്ടായത് തന്റെ പിഴവാണെന്ന് ധോണി തന്നെ സമ്മതിച്ചിരുന്നു.
