ബെര്ലിന്: പ്രണയത്തിന് കണ്ണില്ലെന്നും അതിരില്ലെന്നുമൊക്കെ നാം കേട്ടിട്ടുണ്ട്. എന്നാല് പ്രണയം മൂത്ത് വിമാനത്തെ വിവാഹം കഴിക്കാനൊരുങ്ങുന്ന യുവതിയെ കുറിച്ച് നിങ്ങള് കേട്ടിട്ടുണ്ടോ. ജര്മ്മനിയിലാണ് ഇത്തരമൊരു വേറിട്ട വിവാഹം നടക്കാന് പോകുന്നത്. ബോയിംഗ് 737-800 വിമാനമാണ് വരന്. മിഷേല് കോബ്കി എന്ന യുവതിയാണ് വധു. കഴിഞ്ഞ ആറു വര്ഷമായി മിഷേല് വിമാനവുമായി പ്രണയത്തിലാണ്. കഴിഞ്ഞ അഞ്ചു വര്ഷമായി വിമാനത്താവളത്തിലെ ജാലകത്തില് കൂടി മാത്രമാണ് മിഷേലിന് തന്റെ കാമുകനെ കാണാന് കഴിഞ്ഞിരുന്നത്. എന്നാല് ഇക്കഴിഞ്ഞ സെപ്തംബറില് ഈ വിമാനത്തെ അടുത്ത് കാണാന് സാധിച്ചതോടെയാണ് വിവാഹം കഴിച്ചേ അടങ്ങൂ എന്ന വാശി മിഷേലിന് ഉണ്ടായത്.
വരുന്ന മാര്ച്ചില് ആംസ്റ്റര്ഡാമില് വെച്ച് വിവാഹം നടത്താനാണ് മിഷേലിന്റെ പദ്ധതി. അടുത്ത ബന്ധുക്കളെ മാത്രം വിളിച്ച് ലളിതമായ ചടങ്ങിലാണ് വിവാഹം നടത്തുക. മനസില്ലാ മനസോടെയാണെങ്കിലും മകളുടെ ആഗ്രഹത്തിന് ഒപ്പം നില്ക്കുകയാണ് മിഷേലിന്റെ മാതാപിതാക്കള്. സെയില്സ് വുമണ് ആയി ജോലി ചെയ്യുകയാണ് മിഷേല്. വിമാന ഭാഗങ്ങള് ശേഖരിക്കുകയാണ് മിഷേലിന്റെ ഹോബി. എയര്ക്രാഫ്റ്റ് മെക്കാനിക് ആകുകയാണ് മിഷേലിന്റെ ആഗ്രഹം.
അതേസമയം ഒബ്ജക്ടോഫീലിയ എന്ന മാനസികാവസ്ഥയാണ് മിഷേലിനെന്നാണ് മാനസികാരോഗ്യ വിദഗ്ധര് പറയുന്നത്. നിര്ജീവ വസ്തുക്കളോട് പ്രണയം തോന്നുന്ന അവസ്ഥയാണ് ഒബ്ജക്ടോഫീലിയ. ജീവനില്ലാത്ത വസ്തുക്കളോട് തോന്നുന്ന ഇത്തരം ആകര്ഷണം ലോകത്തിന്റെ പല ഭാഗത്തും റിപ്പോര്ട്ട് ചെയ്യപ്പെട്ടെങ്കിലും ഇത് വിവാഹത്തിലേക്ക് നീങ്ങുന്നത് ആദ്യത്തെ സംഭവമാണ്.
