ഹാമിൽട്ടൻ: അന്താരാഷ്‌ട്ര ക്രിക്കറ്റിൽ മറ്റൊരു റെക്കോർഡുകൂടി സ്വന്തമാക്കി ഹിറ്റ് മാൻ രോഹിത് ശർമ്മ. ഓപ്പണറായി 10,000 റൺസ് നേടുന്ന മൂന്നാമത്തെ ഇന്ത്യൻ താരമെന്ന നേട്ടമാണ് രോഹിത് ഇന്ന് കുറിച്ചത്. സച്ചിൻ, സേവാഗ്, ഗവാസ്കർ എന്നിവരാണ് ഇതിനുമുൻപ് ഓപ്പണറായി 10,000 ക്ലബ്ബിലെത്തിയ ഇന്ത്യൻ താരങ്ങൾ.
ഓപ്പണറായി ഇന്ത്യയ്‌ക്ക് വേണ്ടി ഏറ്റവുമധികം അന്താരാഷ്‌ട്ര റൺസ് സ്വന്തമാക്കിയത് വീരേന്ദർ സേവാഗാണ്. 15758 റൺസാണ് വീരുവിന്റെ സമ്പാദ്യം. പട്ടികയിൽ രണ്ടാമതുള്ളത് ഇന്ത്യയുടെ ക്രിക്കറ്റ് ഇതിഹാസം സച്ചിൻ ടെൻഡുൽക്കറാണ്. 15335 റൺസാണ് സച്ചിന്റെ സമ്പാദ്യം. മൂന്നാമതുള്ള സുനിൽ ഗവാസ്കർ 12,258 റൺസ് സ്വന്തമാക്കിയിട്ടുണ്ട്. ഇപ്പോൾ പട്ടികയിലേക്കെത്തിയ രോഹിതിന്റെ അക്കൗണ്ടിൽ 10,017 റൺസാണുള്ളത്.
40 പന്തിൽ നിന്ന് 65 റൺസുമെടുത്ത് തകർപ്പൻ പ്രകടനവും ഇന്ന് രോഹിത് പുറത്തെടുത്തു. ഒപ്പം സൂപ്പർ ഓവറിലും താരം തിളങ്ങി. നാല് പന്തിൽ നിന്ന് രണ്ട് സിക്സറുകളടക്കം 15 റൺസാണ് രോഹിത് നേടിയത്. ഇതാണ് സൂപ്പർ ഓവറിൽ ഇന്ത്യയെ ജയത്തിലേക്ക് നയിച്ചത്.
