ബാഴ്‌സലോണ: ഫുട്‌ബോള്‍ ലോകത്ത് പകരം വെക്കാനില്ലാത്ത താരങ്ങളില്‍ ഒരാളാണ് ബാഴ്‌സലോണയുടെ അര്‍ജന്റീനിയന്‍ സ്‌ട്രൈക്കര്‍ ലയണല്‍ മെസി. തന്റെ 32ാം വയസിലും മികച്ച രീതിയില്‍ പന്തു തട്ടുന്ന മെസിക്ക് മുന്നില്‍ അധികം വൈകാതെ തകര്‍ന്നു വീഴാന്‍ സാധ്യതയുള്ള 5 പ്രധാന റെക്കോര്‍ഡുകള്‍ ഏതൊക്കെയാണെന്ന് നോക്കാം.
1. കരിയറില്‍ 700 ഗോളുകള്‍
സ്വന്തം രാജ്യത്തിനും ക്ലബിനുമായി 700 ഗോളുകള്‍ എന്ന നാഴികക്കല്ല് പിന്നിടാന്‍ മെസിക്ക് മുന്നിലുള്ള ദൂരം വെറും 8 ഗോളുകള്‍ മാത്രം. നിലവില്‍ 851 മത്സരങ്ങളില്‍ നിന്നും 692 ഗോളുകളാണ് മെസിയുടെ സമ്പാദ്യം. അര്‍ജന്റീനക്കായി 70 ഗോളുകള്‍ നേടിയ താരം ബാഴ്‌സലോണക്കു വേണ്ടി 622 ഗോളുകള്‍ നേടിക്കഴിഞ്ഞു.
2. കരിയറില്‍ 300 അസിസ്റ്റുകള്‍
ഗോളടിക്കുകയും സഹതാരങ്ങളെക്കൊണ്ട് ഗോളടിപ്പിക്കുകയും ചെയ്താണ് മെസി കളിക്കളത്തില്‍ നിറഞ്ഞു നില്‍ക്കുന്നത്. കഴിഞ്ഞ മത്സരത്തില്‍ റിയല്‍ ബെറ്റിസിനെതിരെ ഗോള്‍ നേടാനായില്ലെങ്കിലും മൂന്ന് ഗോളുകള്‍ക്കാണ് മെസി വഴിയൊരുക്കിയത്. നിലവില്‍ 288 ഗോളുകള്‍ക്കാണ് മെസി വഴിയൊരുക്കിയിരിക്കുന്നത്. 12 അസിസ്റ്റുകള്‍ കൂടി നല്‍കിയാല്‍ ചരിത്രത്തിലാദ്യമായി 300 അസിസ്റ്റുകള്‍ നല്‍കുന്ന കളിക്കാരന്‍ എന്ന റെക്കോര്‍ഡാണ് മെസിയെ കാത്തിരിക്കുന്നത്.
3. ഒരു ക്ലബിനു വേണ്ടി ഏറ്റവും കൂടുതല്‍ ഗോളുകള്‍
22 ഗോളുകള്‍ കൂടി നേടാനായാല്‍ ഒരു ക്ലബിനു വേണ്ടി ഏറ്റവും കൂടുതല്‍ ഗോളുകള്‍ നേടുന്ന താരമെന്ന റെക്കോര്‍ഡ് മെസി സ്വന്തമാക്കും. നിലവില്‍ സാന്റോസിന് വേണ്ടി 643 ഗോളുകള്‍ നേടിയ ഫുട്‌ബോള്‍ ഇതിഹാസം പെലെയാണ് മെസിക്കു മുന്നിലുള്ളത്.
4. 20 ഗോളുകള്‍/അസിസ്റ്റുകള്‍ നേടിയാല്‍ 1000 ഗോളുകളില്‍ നേരിട്ട് പങ്കാളിത്തം നേടുന്ന ആദ്യ താരം
കരിയറില്‍ 20 ഗോളുകളോ അസിസ്റ്റുകളോ നേടിയാല്‍ തന്റെ രാജ്യവും ക്ലബും സ്‌കോര്‍ ചെയ്ത 1000 ഗോളുകളില്‍ മെസി നേരിട്ട് പങ്കാളിയാകും. അങ്ങനെയെങ്കില്‍ ഫുട്‌ബോള്‍ ചരിത്രത്തിലാദ്യമായാകും ഒരു താരം 1000 ഗോളുകളില്‍ പങ്കാളിത്തം വഹിക്കുന്നത്.
5. 2 ട്രോഫികള്‍ കൂടി സ്വന്തമാക്കിയാല്‍ ഒരു ക്ലബിനു വേണ്ടി ഏറ്റവും കൂടുതല്‍ ട്രോഫികള്‍ നേടുന്ന താരം
ബാഴ്‌സലോണക്ക് വേണ്ടി 34 ട്രോഫികളാണ് മെസി സ്വന്തമാക്കിയിരിക്കുന്നത്. 2 ട്രോഫികള്‍ കൂടി നേടിയാല്‍ ഒരു ക്ലബിനു വേണ്ടി ഏറ്റവും കൂടുതല്‍ ട്രോഫികള്‍ നേടുന്ന താരമെന്ന റെക്കോര്‍ഡ് മെസി സ്വന്തമാക്കും. നിലവില്‍ ഉക്രെയിന്‍ പ്രീമിയര്‍ ലീഗില്‍ ഡൈനാമോ കൈവിവിനു വേണ്ടി 36 കിരീടങ്ങള്‍ നേടിയ ഒലെക്‌സാണ്ടര്‍ ഷോവ്‌കോവ്‌സ്‌കിയുടെ പേരിലാണ് റെക്കോര്‍ഡ്.
