ബംഗളൂരു: സാമൂഹിക മാദ്ധ്യമ അക്കൗണ്ടുകളിലെ ലോഗോ പിൻവലിച്ച് റോയൽ ചലഞ്ചേഴ്സ് ബാംഗ്ലൂർ. ഫേസ്ബുക്, ട്വിറ്റർ, ഇൻസ്റ്റഗ്രാം അടക്കമുള്ളവയിലെ ലോഗോയാണ് ആർസിബി പിൻവലിച്ചത്. ഇതുവരെ കിരീടം നേടാനാവാത്ത ടീം പേരിൽ മാറ്റം വരുത്തി ഭാഗ്യപരീക്ഷണത്തിനൊരുങ്ങുകയാണെന്ന് ടീമിനോട് അടുത്ത വൃത്തങ്ങളെ ഉദ്ധരിച്ച് ചില ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നു.
ഫെബ്രുവരി 14 ന് വേണ്ടി കാത്തിരിക്കൂവെന്ന് ആവശ്യപ്പെട്ട് ആർസിബി ഒരു പോസ്റ്റും ഇട്ടിട്ടുണ്ട്. പുതിയ ദശാബ്ദത്തിൽ പുതിയ ആർസിബി എന്ന തലക്കെട്ടും ടീമിന്റെ സാമൂഹിക മാദ്ധ്യമങ്ങളിൽ പങ്കുവച്ചിട്ടുണ്ട്.
അതേസമയം, ടീമിന്റെ ലോഗോയും ചിത്രങ്ങളും സാമൂഹിക മാദ്ധ്യമങ്ങളിൽ നിന്ന് പിൻവലിച്ച് മാനേജ്മെന്റ് നടപടിയിൽ അതൃപ്തിയറിയിച്ച് നായകൻ വിരാട് കോഹ് ലി രംഗത്തെത്തി. പോസ്റ്റുകള് അപ്രത്യക്ഷമായി, പക്ഷെ ക്യാപ്റ്റനെ ഇതേക്കുറിച്ച് അറിയിച്ചില്ല. നിങ്ങള്ക്കു എന്തെങ്കിലും സഹായം ആവശ്യമെങ്കില് തന്നെ അറിയിക്കൂവെന്നും കോഹ് ലി ട്വീറ്റ് ചെയ്തു.
മുത്തൂറ്റ് ഗ്രൂപ്പുമായി സഹകരിക്കാൻ ആർസിബി അടുത്തിടെ തീരുമാനിച്ചിരുന്നു. ഇതിനോടനുബന്ധിച്ച് ടീമിന്റെ ലോഗോയും ജഴ്സിയും മാറ്റുന്നതിന്റെ ഭാഗമായാണ് പഴയ ലോഗോയും ചിത്രങ്ങളും പിൻവലിച്ചതെന്ന റിപ്പോർട്ടുകളുമുണ്ട്.
