ഈസ്റ്റ് ലണ്ടന്‍ ( ദക്ഷിണാഫ്രിക്ക) : ദക്ഷിണാഫ്രിക്കക്കെതിരെ ഒറ്റ റണ്‍സിന് തോറ്റ ഇംഗ്ലണ്ട് ഇനിയും പഠിക്കാനുണ്ടെന്ന് ക്യാപ്റ്റന്‍ ഇയാന്‍ മോര്‍ഗന്‍ പറഞ്ഞു. ഡെയില്‍ സ്‌റ്റെയിനിന്റെ പ്രതിഭക്ക് മുന്നിലാണ് ഇംഗ്ലണ്ട് വീണത്. 178 റണ്‍സ് പിന്തുടര്‍ന്ന ഇംഗ്ലണ്ടിനെ അവസാന നിമിഷം ദക്ഷിണാഫ്രിക്ക വീഴ്‌ത്തി.
ലോകകപ്പ് ടി20 മത്സരങ്ങള്‍ പടിവാതില്‍ക്കലെത്തി നില്‍ക്കെ ഇംഗ്ലണ്ടിന്റെ തയ്യാറെടുപ്പ് പോരാ എന്ന അഭിപ്രായക്കാരനാണ് മോര്‍ഗന്‍. നിലവിലെ ഏകദിന ചാമ്പ്യന്മാരായ ഇംഗ്ലണ്ട് ഓസ്‌ട്രേലിയയില്‍ നടക്കാനിരിക്കുന്ന ടി20 ലോകകിരീടം നേടി തുടര്‍ച്ചയായി രണ്ടു കിരീട നേട്ടമെന്ന അപൂര്‍വ്വ റെക്കോഡ് നേടാനുള്ള ഒരുക്കത്തിലാണ്.
ജയ്‌സണ്‍ റോയിയുടെ 38 പന്തില്‍ 70 റണ്‍സിന്റെ തകര്‍പ്പന്‍ ബാറ്റിംഗ് അനായാസ ജയം സമ്മാനിക്കുമെന്ന നിലയിലാണ് നാല് ഓവറുകളില്‍ തുടരെ 3 വിക്കറ്റുകള്‍ അടിയറവച്ച് കളി തോറ്റത്. മോര്‍ഗന്റെ 52 റണ്‍സ്, ജയിക്കാന്‍ 7 പന്തില്‍ വെറും 7 റണ്‍സെന്ന അവസ്ഥയിലെത്തിച്ചിട്ടും ടീം തോറ്റത് അപ്രതീക്ഷിതമായെന്ന് മോര്‍ഗന്‍ സ്വയം കുറ്റപ്പെടുത്തി.
