കൊച്ചി: ഇന്ത്യൻ സൂപ്പർ ലീഗ് ഫുട്ബോളിൽ കേരള ബ്ലാസ്റ്റേഴ്സ് എഫ്സിയ്ക്ക് ഇന്ന് അവസാന ഹോം മത്സരം. ടൂർണമെന്റലെ കരുത്തരായ ബംഗളൂരു എഫ്സിയാണ് ബ്ലാസ്റ്റേഴ്സിന്റെ എതിരാളികൾ. നിലവിൽ ബാക്കിയുള്ള മത്സരങ്ങൾ വിജയിച്ചാലും പട്ടികയിൽ കാര്യമായ വിത്യാസങ്ങളുണ്ടാക്കാൻ ടീമിനാകില്ല. പക്ഷെ ശനിയാഴ്ച നടക്കുന്ന മത്സരം ബ്ലാസ്റ്റേഴ്സിന് അഭിമാനപ്പോരാട്ടമാണ്. യോഗ്യതാറൗണ്ടിലേക്കുള്ള സാദ്ധ്യതകൾ അസ്തമിച്ചു നിൽക്കുന്ന ബ്ലാസ്റ്റേഴ്സിന്, ഇന്ന് വിജയിച്ചാൽ തങ്ങളുടെ ആരാധകർക്ക് കൊടുക്കുവാൻ സാധിക്കുന്ന ഏറ്റവും മികച്ച സമ്മാനമായിരിക്കും അത്.
അതുകൊണ്ടു തന്നെ ജയിക്കാനുറച്ചാകും മഞ്ഞപ്പട ഇന്നിറങ്ങുക. കഴിഞ്ഞ സീസണിലെ ചാമ്പ്യൻമാരായ ബംഗളൂരുവിനോടെതിരിടുമ്പോൾ ഭയക്കുന്നത് ബ്ലാസ്റ്റേഴ്സ് ടീമാകില്ലയെന്ന് നിസംശയം പറയാം. പതിമൂന്നാം തീയതി നടന്ന പത്രസമ്മേളനത്തിൽ ബംഗളൂരു കോച്ച് ശരിവച്ചതും അത് തന്നെയാണ്. ഈ ഘട്ടത്തിൽ എന്താകും ബ്ലാസ്റ്റേഴ്സ് ടീം മഞ്ഞപ്പടക്കായി ബാക്കി വയ്ക്കുകയെന്നറിയാൻ കാത്തിരിക്കുകയാണ് ആരാധകർ.
