ലണ്ടന്: ഇംഗ്ലീഷ് പ്രീമിയര് ലീഗിലെ വമ്പന്മാരായ മാഞ്ചസ്റ്റര് സിറ്റിക്ക് ചാമ്പ്യന്സ് ലീഗില് നിന്ന് യുവേഫയുടെ വിലക്ക്. രണ്ടു സീസണുകളില് നിന്നാണ് സ്റ്റാര് ടീമിനെ വിലക്കിയിരിക്കുന്നത്. വന് സാമ്പത്തിക ക്രമക്കേടാണ് യുവേഫ സാമ്പത്തിക സമിതി കണ്ടെത്തിയിരിക്കുന്നത്. വിലക്കിനൊപ്പം 236 കോടിരൂപ പിഴയും ചുമത്തിയാണ് കായികലോകത്തെ ഞെട്ടിച്ചിരിക്കുന്നത്. വിലക്ക് വന്നതോടെ സിറ്റിക്ക് 2022-23 സീസണ് വരെ ഒരു യൂറോപ്യന് മത്സരങ്ങളിലും യൂറോപ്പാ ലീഗിലും കളിക്കാനാകില്ല.
യുവേഫയുടെ മാനദണ്ഡങ്ങളെല്ലാം സിറ്റി ലംഘിച്ചെന്നും സ്പോണ്സര്ഷിപ്പ് റവന്യൂ അടക്കമുള്ളവയുടെ ശരിയായ വിവരം മറച്ചുവച്ചുവെന്നും യുവേഫാ സാമ്പത്തിക ഓഡിറ്റ് വിഭാഗം കണ്ടെത്തിയിരുന്നു. യുവേഫയുടെ ഫെയര്പ്ലേ നിയമത്തിന്റെ ഭാഗമാണ് ക്ലബ്ബിന്റെ നടത്തിപ്പും മറ്റ് പ്രവര്ത്തനങ്ങളുമെന്നതിനാല് ശക്തമായ നടപടികളാണ് ക്ലബ്ബുകള്ക്ക് നേരിടേണ്ടിവരികയെന്നും യുവേഫാ അധികൃതര് വ്യക്തമാക്കി. 2012-2016 സീസണിലെ സാമ്പത്തികമായ കണക്കുകള് സമര്പ്പിക്കുന്നതില് ക്ലബ്ബ് വീഴ്ച്ചവരുത്തി. വരുമാനത്തിന്റെ കാര്യത്തില് പലതും മറച്ചുവച്ചതായും കണ്ടെത്തി.
വിലക്കിനെതിരെ അപ്പീല് സമര്പ്പിക്കുമെന്ന് സിറ്റി ക്ലബ്ബ് അധികൃതര് അറിയിച്ചു. നടപടി വളരെ ബാലിശമാണെന്നാണ് സിറ്റി അധികൃതര് ആരോപിക്കുന്നത്. യുവേഫാ തന്നെ അന്വേഷിച്ച് അവര്തന്നെ വിധിക്കുന്ന നടപടികളോട് യോജിക്കാനാവില്ലെന്നും ക്ലബ്ബ് ആരോപിച്ചു. തികച്ചും നിഷ്പക്ഷമായ തീരുമാനം ഇതിലുണ്ടാകണമെന്ന് ആഗ്രഹിക്കുന്നുവെന്നും മാഞ്ചസ്റ്റര് സിറ്റി അധികൃതര് പറഞ്ഞു.
നിലവില് പ്രീമിയര് ലീഗില് രണ്ടാം സ്ഥാനക്കാരായി മുന്നേറുന്ന സിറ്റി, ഈ സീസണിലെ ചാമ്പ്യന്സ് ലീഗിലെ ഗ്രൂപ്പ് സിയില് 6 കളികളിലായി 14 പോയിന്റോടെ ഒന്നാം സ്ഥാനത്തുമാണ്. ബെര്ണാഡോ സില്വ, സ്്പാനിഷ് താരങ്ങളായ ഡേവിഡ് സില്വ, റോഡ്രിഗോ, അര്ജ്ജന്റീനയുടെ സെര്ഗി അഗ്യൂറോ, ബ്രസീലിന്റെ ഫെര്നാന്റീനോ തുടങ്ങിയ ലോകോത്തര താരങ്ങള് കളിക്കുന്ന ക്ലബ്ബ് വന് കുരുക്കിലാണ് പെട്ടിരിക്കുന്നത്.
