അമേരിക്കന് പ്രസിഡണ്ട് ഡൊണാള്ഡ് ട്രംപിന്റെ ഇന്ത്യാ സന്ദര്ശനവേളയില് ഇന്തോ പസഫിക് നാവികസേനയുടെ കരുത്ത് വര്ദ്ധിപ്പിക്കുന്നതിനായുള്ള ചര്ച്ചകള് നടക്കുമെന്ന് സൂചന. ഇതിന്റെ ഭാഗമായാണ് 24 എംഎച്ച് -60 ആര് ഹെലികോപ്റ്ററുകള് വാങ്ങുന്നതിനുള്ള തീരുമാനം ഇന്ത്യ കൈക്കൊണ്ടതെന്നാണ് റിപ്പോര്ട്ടുകള് സൂചിപ്പിക്കുന്നത്.
ഇന്തോ-പസഫിക് മേഖലയിലെ ഇന്ത്യയുടെ കരുത്ത് വര്ധിപ്പിക്കുന്നതിനും കര, നാവിക, വ്യോമ സേനകളുടെ സംയുക്ത പ്രവര്ത്തനത്തിനായുള്ള ഉഭയകക്ഷി കരാറുകള് ശക്തിപ്പെടുത്തുന്നതിനുമായി കേന്ദ്രസര്ക്കാരും യുഎസ് പ്രതിരോധ വകുപ്പും തമ്മില് ചര്ച്ചകള് നടന്നുവരികയാണ്. ഇരുരാജ്യങ്ങളും തമ്മിലുള്ള ശക്തമായ സൈനിക ബന്ധത്തിലേക്ക് ശ്രദ്ധ കേന്ദ്രീകരിക്കുന്നു എന്നതിന്റെ സൂചനയായാണ് ഇക്കാര്യങ്ങളെ
വിലയിരുത്തപ്പെടുന്നത്.
ഫെബ്രുവരി 24 ന് ആരംഭിക്കുന്ന ട്രംപിന്റെ ഇന്ത്യാ സന്ദര്ശനത്തിന് മുന്നോടിയായാണ് 24 എംഎച്ച് -60 ആര് ഹെലികോപ്റ്ററുകള് വാങ്ങാന് ഇന്ത്യ തീരുമാനം എടുത്തത്. ഇന്തോ-പസഫിക്കിലെ നാവികസേനയുടെ കരുത്ത് കൂട്ടുന്നതിനായുള്ള ഒരു അഭ്യാസത്തിന്റെ ഭാഗമായാണ് ഇന്ത്യയുടെ ഈ നീക്കത്തെ നയതന്ത്രവിദഗ്ദ്ധര് കാണുന്നത്.
ഫ്രിഗേറ്റുകളും ഡിസ്ട്രോയറുകളും ഉള്പ്പെടെ വിവിധ യുദ്ധക്കപ്പലുകളില് നിന്ന് വിക്ഷേപിക്കാന് കഴിയുന്ന പുതിയ ചോപ്പറുകള്, അന്തര്വാഹിനികളുടെ ശേഷി വര്ദ്ധിപ്പിക്കും. ഈ ഹെലികോപ്റ്ററുകള് വഹിക്കുന്ന ഹെല്ഫയര് മിസൈലുകള്ക്ക് കരയില് നിന്നുള്ള ആക്രമണങ്ങളെയും തകര്ക്കാനാകും. എഴുപതുകളുടെ വിന്റേജ് സീ കിംഗ് അന്തര്വാഹിനി ഹെലികോപ്റ്ററുകള്ക്ക് പകരമായാണ് എംഎച്ച് -60 ആര് ഹെലികോപ്റ്ററുകള് എത്തുന്നത്.
ഇന്തോ പസഫിക്കിന്റെ ചില ഭാഗങ്ങളില് ആധിപത്യം ഉറപ്പിക്കുന്നതിനായാണ് യുഎസ് നിര്മ്മിച്ച എട്ട് പി 8 ഐ വിമാനങ്ങള് നാവികസേന ഏറ്റെടുക്കുന്നത് . ഉപരിതലവും അന്തര്വാഹിനി ഭീഷണികളും നേരിടാന് അരക്കോണം ആസ്ഥാനമായി പ്രവര്ത്തിക്കുന്ന ഈ മാരിടൈം പട്രോളിംഗ് വിമാനങ്ങള് നാവികസേനയുടെ പി 8 എ വിമാനവുമായി ഡിജിറ്റലായി ബന്ധപ്പെടുത്തുമെന്നതും അടുത്ത പ്രത്യേകതയാണ്. 2018 സെപ്റ്റംബറില് കമ്മ്യൂണിക്കേഷന്സ്, കോംപാറ്റിബിലിറ്റി, സെക്യൂരിറ്റി കരാറില് ഇന്ത്യയും അമേരിക്കയും ഒപ്പുവച്ചതിനുശേഷം ഇന്തോ-പസഫിക്ക് മേഖലയിലെ പ്രതിരോധപ്രവര്ത്തനങ്ങള് പുതിയ തലത്തില് എത്തിയതായാണ് റിപ്പോര്ട്ട്.
