ലണ്ടന്: ട്യൂമര് ശസ്ത്രക്രിയയ്ക്കിടെ വയലിന് വായിച്ച് ലോകത്തെ ഞെട്ടിച്ചിരിക്കുകയാണ് അന്പത്തി മൂന്നുകാരിയായ ഡാഗ്മര് ടര്ണര്. ലണ്ടനിലാണ് സംഭവം.വയലിന് ജീവശ്വാസം തന്നെയാണ് ഡാഗ്മറിന്. ട്യൂമര് ശസ്ത്രക്രിയയ്ക്കിടെ കൈയ്ക്ക് ശേഷി കുറവ് ഉണ്ടാകില്ലെന്ന് ബോധ്യപ്പെടുത്താനാണ് ഇത്തരമൊരു പരീക്ഷണം ഡോക്ടര്മാര് നടത്തിയത്. തന്റെ 10 -ാം വയസ് മുതല് വയലിനുമായി ചങ്ങാത്തം കൂടിയതാണ് ഡാഗ്മര്.
ജോലിക്കിടയിലും വയലിന് വായിക്കാന് ഡാഗ്മര് സമയം കണ്ടെത്തിയിരുന്നു. തന്റെ 53 -ാം വയസിലാണ് ട്യൂമര് ബാധിച്ച വിവരം ഡാഗ്മര് അറിയുന്നത്. ഡോക്ടര്മാര് ശസ്ത്രക്രിയയ്ക്ക് വിധേയമാകണമെന്ന് ആവശ്യപ്പെട്ടപ്പോള് ശസ്ത്രക്രിയ തന്റെ കൈകളുടെ ചലന ശേഷിയെ ബാധിക്കുമോയെന്ന ചോദ്യം മാത്രമാണ് ഡാഗ്മര് ചോദിച്ചത്. കൈകളുടെ ചലനശേഷിയ്ക്ക് ഒന്നും സംഭവിക്കില്ലെന്ന് ഉറപ്പിക്കാനാണ് ഇത്തരമൊരു പരീക്ഷണത്തിന് ഡോക്ടര്മാര് തയ്യാറായത്.
ബ്രെയിന് മാപ്പിംഗ് നടത്തി തലയോട്ടി തുറന്ന് ട്യൂമര് 90 ശതമാനവും ഡോക്ടര്മാര് നീക്കം ചെയ്തു. ഈ ശസ്ത്രക്രിയയ്ക്കിടെയാണ് കൈകളുടെ ചലന ശേഷി ഉറപ്പിക്കാനായി ഡാഗ്മറെ കൊണ്ട് ഡോക്ടര്മാര് വയലിന് വായിപ്പിച്ചു കൊണ്ടോയിരുന്നത്. തന്റെ വൈദ്യശാസ്ത്ര ജീവിതത്തില് ഇത്തരമൊരു അനുഭവം ആദ്യമായിട്ടാണെന്ന് കിംഗ്സ് ആശുപത്രിയിലെ ന്യൂറോ സര്ജനായ അഷ്കാന് പറഞ്ഞു. ശസ്ത്രക്രിയ്ക്കിടെ വയലിന് വായിക്കുന്ന ഡാഗ്മറിന്റെ വീഡിയോ സാമൂഹ്യ മാദ്ധ്യമങ്ങള് ഇതിനോടകം തന്നെ ഏറ്റെടുത്തു കഴിഞ്ഞു.