ബാഴ്സലോണ: ബാഴ്സലോണയുടെ അര്ജന്റൈന് സ്ട്രൈക്കര് ലയണല് മെസി ഫുട്ബോള് ആരാധകര്ക്ക് ഏറെ പ്രിയപ്പെട്ട താരമാണ്. ദീര്ഘ നാളത്തെ കരിയറില് നിരവധി ഉയര്ച്ച-താഴ്ച്ചയിലൂടെ അദ്ദേഹം കടന്നുപോയിട്ടുണ്ട്. ലോകകപ്പിന്റെ കലാശപ്പോരാട്ടത്തിലും കോപ്പ അമേരിക്കയുടെ ഫൈനലില് രണ്ട് തവണ അര്ജന്റീന പരാജയപ്പെട്ടോഴും ഏറ്റവുമധികം വിമര്ശനങ്ങള്ക്ക് വിധേയനായത് മെസിയായിരുന്നു. എന്നാല് ഇപ്പോള് ഇതാ തന്റെ യഥാര്ത്ഥ വിമര്ശകന് ആരെന്ന് മെസി വെളിപ്പെടുത്തിയിരിക്കുകയാണ്.
മെസിയോളം തന്നെ ആരാധകര്ക്കിടയില് പ്രിയപ്പെട്ടവതാണ് മെസിയുടെ കുടുംബവും. പ്രത്യേകിച്ച അദ്ദേഹത്തിന്റെ മക്കളായ തിയാഗോയും മാറ്റേയോയും. ബാഴ്സലോണയുടെ തോല്വികളുടെ പേരില് മറ്റേയോ തന്നെ കളിയാക്കാറുണ്ടെന്ന് മെസി നേരത്തെ വെളിപ്പെടുത്തിയിരുന്നു. എന്നാല് മൂത്ത മകന് തിയാഗോയാണ് തന്റെ ഏറ്റവും പ്രധാന വിമര്ശകനെന്നാണ് മെസി ഇപ്പോള് പറയുന്നത്.
കഴിഞ്ഞ ദിവസം മുണ്ടോ ഡിപോര്ട്ടീവോയ്ക്ക് നല്കിയ അഭിമുഖത്തിലാണ് മെസി തിയാഗോയെക്കുറിച്ച് സംസാരിച്ചത്. മോശം പ്രകടനവും തോല്വികളും ഉള്ക്കൊള്ളാനും അതേക്കുറിച്ച് സംസാരിക്കാനും ബുദ്ധിമുട്ടാണ്. എന്നാല് തിയാഗോ എന്നോട് അതേക്കുറിച്ച് സംസാരിക്കാന് നിര്ബന്ധിക്കും. ഇടയക്കിടയ്ക്ക് വിമര്ശനങ്ങളും ഉയര്ത്താറുണ്ടെന്ന് മെസി പറഞ്ഞു. തിയാഗോ മത്സരങ്ങള് കൃത്യമായി പിന്തുടരുകയും നിരന്തരം ചോദ്യങ്ങള് ചോദിക്കാറുമുണ്ടെന്നും മെസി കൂട്ടിച്ചേര്ത്തു.