ഇംഗ്ലീഷ് ലീഗ് കപ്പ്: മാഞ്ചസ്റ്റര്‍ സിറ്റിക്ക് ഹാട്രിക് കിരീടം

ലണ്ടന്‍: ഇംഗ്ലീഷ് ലീഗ് കറബാവോ കപ്പ് ഫുട്‌ബോള്‍ കിരീടം മാഞ്ചസ്റ്റര്‍ സിറ്റിക്ക്. ആസ്റ്റണ്‍ വില്ലയെ ഒന്നിനെതിരെ രണ്ടു ഗോളുകള്‍ക്ക് തോല്‍പ്പിച്ചാണ് തുടര്‍ച്ചയായി മൂന്നാം തവണയും സിറ്റി കീരീടം നേടിയത്. കളിയുടെ 20-ാം മിനിറ്റില്‍ സെര്‍ജിയ അഗ്യൂറോ സിറ്റിക്ക് ലീഡ് നല്‍കി. 10 മിനിറ്റിനകം റോഡ്രി ലീഡ് 2-0 ആക്കി ഉയര്‍ത്തി. ആസ്റ്റണ്‍ വില്ലക്കായി 41-ാം മിനിറ്റില്‍ എംവാന സമാട്ടയാണ് ആശ്വാസഗോള്‍ നേടിയത്.

ലീഗ് കപ്പില്‍ ഹാട്രിക് നേടുന്ന രണ്ടാമത്തെ ടീമാണ് സിറ്റി. ലിവര്‍പൂളാണ് മുമ്പ് ഈ നേട്ടം കൈവരിച്ചവര്‍. സിറ്റിയുടെ 7-ാം ലീഗ് കിരീടനേട്ടമാണിത്. ആവേശകരമായ സെമിഫൈനല്‍ പോരാട്ടങ്ങള്‍ക്കാണ് ലീഗ് കപ്പ് സാക്ഷ്യം വഹിച്ചത്. മാഞ്ചസ്റ്റര്‍ സിറ്റിയും മാഞ്ചസ്റ്റര്‍ യുണൈ റ്റഡും രണ്ടു പാദങ്ങളിലായിട്ടാണ് സെമിയില്‍ ഏറ്റുമുട്ടിയത്. ആദ്യപാദത്തില്‍ സിറ്റി 3-1ന് ജയിച്ചപ്പോള്‍ രണ്ടാംപാദത്തില്‍ യുണൈറ്റഡ് 1-0ന് ജയിച്ചെങ്കിലും ഗോള്‍ ശരാശരിയില്‍ മേല്‍കൈയുള്ള സിറ്റി ഫൈനലിലെത്തുകയായിരുന്നു. ആസ്റ്റണ്‍വില്ല ലെസ്റ്റര്‍ സിറ്റിയുമായി 1-1ന് ആദ്യപാദത്തില്‍ സമനിലയും രണ്ടാം പാദത്തില്‍ 2-1ന് ജയവും നേടി 3-2ന്റെ ഗോള്‍ ശരാശരിയിലാണ് ഫൈനലിലെത്തിയത്.