ചെന്നൈ: ദീര്ഘ നാളത്തെ ഇടവേളക്ക് ശേഷം ചെന്നൈ സൂപ്പര് കിംഗ്സ് ജഴ്സിയില് മടങ്ങിയെത്തി മുന് ഇന്ത്യന് നായകന് മഹേന്ദ്ര സിംഗ് ധോണി. എംഎ ചിദംബരം സ്റ്റേഡിയത്തില് ധോണി പരിശീലനത്തിനെത്തിയതോടെ ആരാധകര് ആവേശത്തിലായി. ‘ധോണി…ധോണി’ ആര്പ്പുവിളികളോടെയാണ് ആരാധകര് ഇഷ്ട താരത്തെ സ്വീകരിച്ചത്.
മാര്ച്ച് 29ന് ആരംഭിക്കാനിരിക്കുന്ന ഐപിഎല് മത്സരങ്ങള്ക്കു മുന്നോടിയായാണ് ധോണി പരിശീലനത്തിനെത്തിയത്. നേരത്തെ, ജാര്ഖണ്ഡ് സ്റ്റേഡിയത്തില് താരം പരിശീലനം നടത്തിയിരുന്നെങ്കിലും ആരാധകര്ക്ക് ഇതാദ്യമായാണ് പരിശീലനം നേരില് കാണാന് അവസരം ലഭിക്കുന്നത്. ആദ്യം സ്റ്റേഡിയത്തില് വാം അപ്പ് നടത്തിയ ധോണി പിന്നീട് പാഡ് ധരിച്ചപ്പോള് വലിയ കരഘോഷമാണ് സ്റ്റേഡിയത്തില് ഉയര്ന്നത്.
കാണികളെ കൂടുതല് ആവേശത്തിലാക്കാനായി പരിശീലനത്തിടയില് ധോണി ഏതാനും കൂറ്റന് സിക്സറുകളും പറത്തിയിരുന്നു. ധോണി പരിശീലനത്തിനെത്തുന്ന 41 സെക്കന്റ് ദൈര്ഘ്യമുള്ള വീഡിയോ ചെന്നൈ സൂപ്പര് കിംഗ്സ് തന്നെയാണ് ട്വിറ്ററിലൂടെ പുറത്തുവിട്ടത്. ആദ്യ മത്സരത്തില് നിലവിലെ ചാമ്പ്യന്മാരായ മുംബൈയാണ് സൂപ്പര് കിംഗ്സിന്റെ എതിരാളികള്.
