സിഡ്നി: ഇന്ത്യന് വനിതാ ക്രിക്കറ്റിലെ കൗമാര താരം ഷെഫാലി വെര്മക്ക് ഓസീസ് മുന് ബൗളര് ബ്രെറ്റ് ലീയുടെ പ്രശംസ. നിലവിലെ ഇന്ത്യന് താരങ്ങള്ക്ക് ഷെഫാലിയുടെ കൂസലില്ലാത്ത ബാറ്റിംഗ് ശക്തമായ ഊര്ജ്ജമാണ് നല്കുന്നതെന്ന് ബ്രെറ്റ്ലീ പറഞ്ഞു. ‘ ഷെഫാലി ടോപ് ഓര്ഡറിലെ ഏറ്റവും മികച്ച താരമായിക്കഴിഞ്ഞു. ഇന്ത്യന് ബാറ്റിംഗിന് അവര് പേടിയില്ലാത്ത ഒരു പ്രകൃതം സമ്മാനിച്ചുകഴിഞ്ഞു. ആ ബാറ്റിംഗ് കാണാനും ഒരു രസമുണ്ട്. ഇതുവരെ അര്ദ്ധസെഞ്ച്വറി അടിക്കാനായില്ലെങ്കിലും ഓരോ കളിയിലും അവര് ഏറെ റണ്സ് നേടുമെന്ന തോന്നലാണ് ഉളവാക്കുന്നത്. ബൗളര്മാര്ക്ക് ഒരു പേടി സ്വപ്നമാണ് ഷെഫാലി എന്ന നിലയിലേക്കും മാറുകയാണ്’ ബ്രെറ്റ്ലീ പറഞ്ഞു.
വെറും 16വയസ്സുകാരിയായ ഷെഫാലി ഇത്തവണ വനിതാ ടി20യില് ഒപ്പണറെന്ന നിലയില് മികച്ച ഫോമിലാണ്. സെമിസ്ഥാനം ഉറപ്പിച്ചിരിക്കുന്ന ഇന്ത്യക്കായി ഷെഫാലി ഇതുവരെ അന്താരാഷ്ട്ര ടി20കളില് 438 റണ്സ് നേടിക്കഴിഞ്ഞു. നിലവില് ടി20 ലോകകപ്പില് 161 റണ്സ് നേടി റണ്വേട്ടയില് രണ്ടാം സ്ഥാനത്താണ്. ശ്രീലങ്കക്കെതിരെ നേടിയ 47 റണ്സാണ് ലോകകപ്പിലെ ഷെഫാലിയുടെ ഉയര്ന്ന സ്ക്കോര്.
