മാഡ്രിഡ്: ഇന്ത്യയുടെ വെടിക്കെട്ട് ഓപ്പണർ ഹിറ്റ്മാൻ രോഹിത് ശർമ്മയ്‌ക്ക് റയൽ മാഡ്രിഡിന്റെ ആദരം. എൽ ക്ലാസിക്കോ മത്സരം നേരിട്ട് കാണാനെത്തിയ രോഹിത്തിന് തന്റെ പേരുള്ള 45-ാം നമ്പർ റയൽ മാഡ്രിഡിന്റെ ജഴ്സി നൽകിയാണ് ടീം ആദരിച്ചത്. ലാലിഗയുടെ ഇന്ത്യൻ അംബാസിഡർ കൂടിയാണ് രോഹിത്.
ബാഴ്‌സലോണയും റയല്‍ മാഡ്രിഡും തമ്മിലുള്ള എല്‍ ക്ലാസിക്കോ മത്സരം എന്നെങ്കിലും ഒരിക്കല്‍ നേരിട്ടു കാണണമെന്നായിരുന്നു രോഹിത്തിന്റെ ആഗ്രഹം. ആ ആഗ്രഹം നിറവേറിയതിന്റെ സന്തോഷത്തിലാണ് താരം. കഴിഞ്ഞ ദിവസം റയലിന്റെ തട്ടമായ സാന്റിയാഗോ ബര്‍ണാബുവിലെ തിങ്ങിനിറഞ്ഞ സ്റ്റേഡിയത്തിലിരുന്ന് ഭാര്യയ്‌ക്കൊപ്പമായിരുന്നു രോഹിത് മത്സരം കണ്ടത്.
ഒരിക്കലും മറക്കാത്ത അനുഭവമാണിതെന്നാണ് മത്സരം കണ്ട ശേഷം രോഹിത് തന്റെ സാമൂഹിക മാദ്ധ്യമങ്ങളിൽ കുറിച്ചത്. ഇതിനൊപ്പം സ്റ്റേഡിയത്തിൽ ഭാര്യയ്‌ക്കൊപ്പം നിൽക്കുന്ന ചിത്രങ്ങളും രോഹിത് പങ്കുവച്ചിട്ടുണ്ട്.
