മുംബൈ: റോഡ് സേഫ്റ്റി വേള്‍ഡ് സീരിസ് ടി20 മത്സരത്തില്‍ ഇന്ത്യ ലെജന്‍ഡ്‌സിന് തുടര്‍ച്ചയായ രണ്ടാം ജയം. ശ്രീലങ്കക്കെതിരെ നടന്ന മത്സരത്തില്‍ 5 വിക്കറ്റിനായിരുന്നു ഇന്ത്യയുടെ ജയം. ഇര്‍ഫാന്‍ പഠാന്റെ വെടിക്കെട്ട് ബാറ്റിംഗാണ് ഇന്ത്യയുടെ ജയം അനായാസമാക്കിയത്. ശ്രീലങ്ക നിശ്ചിത 20 ഓവറില്‍ 8 വിക്കറ്റ് നഷ്ടത്തില്‍ 138 റണ്‍സെടുത്തപ്പോള്‍ 5 വിക്കറ്റ് നഷ്ടത്തില്‍ 8 പന്തുകള്‍ ബാക്കി നിര്‍ത്തിയാണ് ഇന്ത്യ വിജയ ലക്ഷ്യം മറികടന്നത്.
നേരത്തെ, ടോസ് നഷ്ടപ്പെട്ട് ബാറ്റിംഗിനിറങ്ങിയ ശ്രീലങ്കക്ക് ഓപ്പണര്‍മാരായ തിലകരത്‌നെ ദില്‍ഷനും(23) റൊമേഷ് കലുവിതരണയും(21) മികച്ച തുടക്കമാണ് നല്‍കിയത്. മൂന്നാമനായെത്തിയ മര്‍വന്‍ അട്ടപ്പട്ടു(1) നിരാശപ്പെടുത്തിയപ്പോള്‍ ചമര കപുഗേദര 23 റണ്‍സെടുത്തു. സേനാനായകെ 19ഉം റംഗണ ഹെരാത് 12ഉം റണ്‍സെടുത്തു.
ഇന്ത്യക്കു വേണ്ടി മുനാഫ് പട്ടേല്‍ 4 ഓവറില്‍ 19 റണ്‍സ് മാത്രം വഴങ്ങി 4 വിക്കറ്റ് വീഴ്‌ത്തി. സഹീര്‍ ഖാന്‍, ഇര്‍ഫാന്‍ പഠാന്‍, മന്‍പ്രീത് ഗോണി, സഞ്ജയ് ബംഗാര്‍ എന്നിവര്‍ ഓരോ വിക്കറ്റ് സ്വന്തമാക്കി.
മറുപടി ബാറ്റിംഗില്‍ തകര്‍ച്ചയോടെയായിരുന്നു ഇന്ത്യയുടെ തുടക്കം. ഓപ്പണര്‍മാരായ സച്ചിന്‍ ടെണ്ടുല്‍ക്കറും വീരേന്ദര്‍ സേവാഗും നിരാശപ്പെടുത്തി. സച്ചിന്‍ റണ്‍സൊന്നുമെടുക്കാതെ പുറത്തായപ്പോള്‍ 3 റണ്‍സ് മാത്രമായിരുന്നു സേവാഗിന്റെ സമ്പാദ്യം. മൂന്നാമനായെത്തിയ മൊഹമ്മദ് കൈഫ് 46 റണ്‍സെടുത്തു. യുവ്‌രാജ് സിംഗ് 1 റണ്‍സുമായി മടങ്ങിയപ്പോള്‍ ഇര്‍ഫാന്‍ പഠാന്‍ ടീമിന്റെ രക്ഷകനായി. 31 പന്തില്‍ 6 ബൗണ്ടറികളും 3 സിക്‌സറുകളും സഹിതം 57 റണ്‍സെടുത്ത പഠാന്‍ പുറത്താകാതെ നിന്നു.
ശ്രീലങ്കക്കു വേണ്ടി ചാമിന്ദ വാസ് 3 ഓവറില്‍ 5 റണ്‍സ് വഴങ്ങി 2 വിക്കറ്റ് വീഴ്‌ത്തി. റംഗണ ഹെരാത്ത്, സചിത്ര സേനാനായകെ എന്നിവര്‍ ഓരോ വിക്കറ്റ് വീതം സ്വന്തമാക്കി.
കളിച്ച രണ്ട് മത്സരങ്ങളും വിജയിച്ച ഇന്ത്യയാണ് പോയിന്റ് പട്ടികയില്‍ ഒന്നാമത്. രണ്ട് കളികളില്‍ ഒരു വിജയവുമായി ശ്രീലങ്ക രണ്ടാം സ്ഥാനത്താണ്.
