ധര്മ്മശാല: ന്യൂസിലന്ഡ് പര്യടനത്തിനു ശേഷം ടീം ഇന്ത്യ നാളെ സ്വന്തം മണ്ണില് അങ്കത്തിന് ഇറങ്ങുന്നു. കരുത്തരായ ദക്ഷിണാഫ്രിക്കയാണ് എതിരാളികള്. മൂന്നു മത്സരങ്ങളുള്പ്പെട്ട പരമ്പരക്കാണ് നാളെ തുടക്കം കുറിക്കുന്നത്. ഉച്ചയ്ക്കു 1.30നാണ് മത്സരം ആരംഭിക്കുക.
ഓപ്പണര് ശിഖര് ധവാന്, ഓള് റൗണ്ടര് ഹര്ദിക് പാണ്ഡ്യ, പേസര് ഭുവനേശ്വര് കുമാര് എന്നിവരുടെ മടങ്ങി വരവിനാണ് ദക്ഷിണാഫ്രിക്കക്കെതിരായ പരമ്പര സാക്ഷ്യം വഹിക്കുക. ന്യൂസിലന്ഡ് പര്യടനത്തിനിടെയാണ് ധവാന് പരിക്കേറ്റത്. ഹര്ദിക് പാണ്ഡ്യ പരിക്കേറ്റ് മാസങ്ങളോളം ടീമിന് പുറത്തായിരുന്നു. പരിക്കില് നിന്ന് മോചിതനായ പാണ്ഡ്യ മികച്ച ഫോമിലാണെന്ന് തെളിയിച്ചു കഴിഞ്ഞു. തിരിച്ചുവരവിലൂടെ ഉജ്ജ്വല പ്രകടനമാണ് ഭുവനേശ്വര് കുമാറും ലക്ഷ്യം വെക്കുന്നത്.
ന്യൂസിലന്ഡ് പര്യടനത്തിലെ മോശം പ്രകടനത്തിന്റെ പേരില് ഏറെ വിമര്ശനങ്ങള് ഏറ്റുവാങ്ങിയ നായകന് വിരാട് കോഹ്ലിക്കും പരമ്പര ഏറെ നിര്ണായകമാണ്. അതേസമയം, ആരാധകര്ക്ക് ആശങ്കയാകുന്നത് ധര്മ്മശാലയിലെ കാലാവസ്ഥയാണ്. ഇടിയോടു കൂടിയ മഴക്ക് സാധ്യതയുണ്ടെന്ന് കാലാവസ്ഥ വകുപ്പ് മുന്നറിയിപ്പ് നല്കിയിട്ടുണ്ട്. രാജ്യത്ത് കൊറോണ വൈറസ് ബാധ നിലനില്ക്കുന്നതിനാല് സ്റ്റേഡിയത്തില് കാണികള് കുറവായിരിക്കുമെന്നാണ് റിപ്പോര്ട്ട്.
