ധര്‍മ്മശാല: സ്വന്തം മണ്ണില്‍ ദക്ഷിണാഫ്രിക്കക്കെതിരായ ഏകദിന പരമ്പരയ്‌ക്ക് തയ്യാറെടുത്ത് ടീം ഇന്ത്യ. നാളെ ധര്‍മ്മശാലയിലാണ് പരമ്പരയിലെ ആദ്യ മത്സരം നടക്കുക. കോവിഡ് 19 പടരുന്ന പശ്ചാത്തലത്തില്‍ തുപ്പല്‍ ഉപയോഗിച്ച് പന്ത് മിനുക്കരുതെന്നാണ് ടീമിന് ലഭിച്ചിരിക്കുന്ന നിര്‍ദ്ദേശം. മത്സരത്തില്‍ ഇരു ടീമുകളും തമ്മിലുള്ള ഹസ്തദാനം ഒഴിവാക്കുമെന്നും റിപ്പോര്‍ട്ടുണ്ട്.
‘ഇക്കാര്യത്തില്‍ ടീം ഡോക്ടറാണ് തീരുമാനമെടുക്കേണ്ടത്. സ്വിംഗ് കണ്ടെത്തുന്നതിനായി പന്തിന്റെ ഒരുവശം മിനുക്കേണ്ടതുണ്ട്. ഇതിന് തുപ്പല്‍ ഉപയോഗിക്കുകയല്ലാതെ മറ്റു മാര്‍ഗങ്ങളില്ല. പന്തു മിനുക്കിയില്ലെങ്കില്‍ ബൗളര്‍മാര്‍ അടിവാങ്ങിക്കൂട്ടാന്‍ സാധ്യതയുണ്ട്. ഇത് പിന്നീട് ബൗളര്‍മാര്‍ക്കെതിരെ വിമര്‍ശനമായി മാറിയേക്കാം. ഭുവനേശ്വര്‍ കുമാര്‍ വാര്‍ത്താസമ്മേളനത്തില്‍ അറിയിച്ചു.
ന്യൂസിലന്‍ഡില്‍ ട്വന്റി20 പരമ്പര സ്വന്തമാക്കിയിരുന്നെങ്കിലും ഏകദിന-ടെസ്റ്റ് പരമ്പരകള്‍ കൈവിട്ടിരുന്നു. മോശം ഫോം തുടരുന്ന ടീം ഇന്ത്യക്കും നായകന്‍ വിരാട് കോഹ്‌ലിക്കും ദക്ഷിണാഫ്രിക്കക്കെതിരായ പരമ്പര നിര്‍ണായകമാണ്. അതേസമയം, നാളത്തെ മത്സരത്തില്‍ മഴ വില്ലനാകാനുള്ള സാധ്യതയും നിലനില്‍ക്കുന്നുണ്ട്.
