മാഡ്രിഡ്: ചാമ്പ്യന്സ് ലീഗില് ബാഴ്സലോണ-നാപോളി മത്സരം നടക്കുക ആളൊഴിഞ്ഞ സ്റ്റേഡിയത്തില്. കോവിഡ് 19 അന്താരാഷ്ട്രതലത്തില് പടരുന്ന സാഹചര്യത്തിലാണ് തീരുമാനം. ചാമ്പ്യന്സ് ലീഗ് പോരാട്ടം അടച്ചിട്ട സ്റ്റേഡിയത്തിലാകും നടക്കുകയെന്ന് ഇരു ക്ലബ്ബുകളും സ്ഥിരീകരിച്ചു. മാര്ച്ച് 18നാണ് ബാഴ്സയും നാപോളിയും ഏറ്റുമുട്ടുക.
ബാഴ്സയുടെ അടുത്ത രണ്ട് ലാ ലീഗാ മത്സരങ്ങളിലും കാണികള്ക്ക് പ്രവേശനമുണ്ടാകില്ല. മാര്ച്ച് 14ന് മല്ലോര്ക്കയ്ക്കും മാര്ച്ച് 22ന് ലെഗനെസിനുമെതിരെയാണ് ബാഴ്സയുടെ മത്സരങ്ങള്. ഫുട്സാല് ഉള്പ്പെടെയുള്ള എല്ലാ പ്രാദേശിക മത്സരങ്ങളും രണ്ടാഴ്ചത്തേക്കെങ്കിലും സസ്പെന്ഡ് ചെയ്തതായി ബാഴ്സലോണ ഫുട്ബോള് ഫെഡറേഷന് അറിയിച്ചു.
അണ്ടര് 19 ഒഴികെയുള്ള എല്ലാ പരിശീലന സെഷനുകളും താത്ക്കാലികമായി നിര്ത്തിവച്ചിരിക്കുകയാണെന്ന് ബാഴ്സലോണ ഔദ്യോഗികമായി പ്രഖ്യാപിച്ചു. ഒരു ബാഴ്സലോണ കളിക്കാരനോ ജീവനക്കാരനോ രോഗലക്ഷണങ്ങളൊന്നുമില്ലെന്ന് ക്ലബ് വക്താവ് വൈവ്സ് വ്യക്തമാക്കി.
