മാഡ്രിഡ്: കോവിഡ് 19 വൈറസ് പടരുന്ന പശ്ചാത്തലത്തില് സ്പാനിഷ് ലീഗ് മത്സരങ്ങള് താത്ക്കാലികമായി നിര്ത്തിവെക്കാന് തീരുമാനം. ഇതോടെ ലാ ലിഗയിലെ എല്ലാ മത്സരങ്ങളും രണ്ട് ആഴ്ചത്തേക്ക് നിര്ത്തിവെക്കുകയാണെന്ന് സ്പാനിഷ് ഫുട്ബോള് അധികൃതര് അറിയിച്ചു.
സ്പാനിഷ് ഫുട്ബോള് ഫെഡറേഷനായ ആര്എഫ്ഇഎഫും സ്പാനിഷ് ഫുട്ബോള് കളിക്കാരുടെ അസോസിയേഷനായ എഎഫ്എയും സ്പാനിഷ് ലീഗ് അധികൃതരും തമ്മില് നടത്തിയ അടിയന്തിര യോഗങ്ങളിലാണ് ലാ ലീഗ മത്സരങ്ങള് താത്ക്കാലികമായി നിര്ത്തിവെക്കാന് തീരുമാനമായത്. എന്നാല്, ചാമ്പ്യന്സ് ലീഗില് ബാഴ്സലോണയും നാപോളിയും തമ്മിലുള്ള മത്സരം കാണികളില്ലാത്ത സ്റ്റേഡിയത്തിലാകും നടക്കുക. കഴിഞ്ഞ ദിവസം വലന്സിയയും അറ്റലാന്റയും തമ്മില് നടന്ന മത്സരത്തിലും കാണികള് ഉണ്ടായിരുന്നില്ല.
അതേസയം, റയല് മാഡ്രിഡിന്റെ ബാസ്കറ്റ് ബോള് ടീമിലെ ഓരു കളിക്കാരന്റെ പരിശോധന ഫലം പോസിറ്റീവ് ആയതോടെ ക്ലബ്ബ് ആശങ്കയിലാണ്. ഇതോടെ മാഡ്രിഡ് താരങ്ങള് ക്വാറന്റൈന് പരിശോധനകള്ക്ക് വിധേയരാകും. സ്പെയിനില് റിപ്പോര്ട്ട് ചെയ്തിരിക്കുന്ന മൊത്തം കേസുകളില് പകുതിയും മാഡ്രിഡിലാണ് രേഖപ്പെടുത്തിയിരിക്കുന്നത്. അതിനാല് മാഡ്രിഡിലെ സ്കൂളുകള്ക്ക് മാര്ച്ച് 25 വരെ അവധി പ്രഖ്യാപിച്ചിരിക്കുകയാണ്.
