ന്യൂഡല്‍ഹി: രഞ്ജി ട്രോഫി ഫൈനലില്‍ ബംഗാളിനെ മുട്ടുകുത്തിച്ച് സൗരാഷ്ട്ര ജേതാക്കള്‍. മത്സരം സമനിലയിലായതോടെ ഒന്നാം ഇന്നിംഗ്‌സിന്റെ ലീഡാണ് സൗരാഷ്‌ട്രക്ക് തുണയായത്. ഇതോടെ ചരിത്രത്തിലാദ്യമായി സൗരാഷ്ട്ര രഞ്ജി ട്രോഫിയില്‍ ജേതാക്കളായി.
ഒന്നാം ഇന്നിംഗ്‌സില്‍ സൗരാഷ്ട്ര 425 റണ്‍സ് കുറിച്ചിരുന്നു. മറുപടി ബാറ്റിംഗില്‍ ബംഗാളിന് 381 റണ്‍സെടുക്കാനേ കഴിഞ്ഞിരുന്നുള്ളൂ. തുടര്‍ന്ന് രണ്ടാം ഇന്നിംഗ്‌സില്‍ സൗരാഷ്ട്ര 4 വിക്കറ്റ് നഷ്ടത്തില്‍ 105 റണ്‍സെന്ന നിലയില്‍ കളി അവസാനിച്ചതോടെയാണ് സൗരാഷ്ട്ര വിജയികളായത്. ഒന്നാം ഇന്നിംഗ്‌സില്‍ നേടിയ 44 റണ്‍സ് ലീഡിന്റെ ആനുകൂല്യത്തില്‍ 149 റണ്‍സായിരുന്നു സൗരാഷ്‌ട്രയുടെ മൊത്തം ലീഡ്.
ഒന്നാം ഇന്നിംഗ്‌സില്‍ അര്‍പിത് വാസവദ(106)യുടെ സെഞ്ച്വറി പ്രകടനമാണ് സൗരാഷ്‌ട്രക്കു മികച്ച സ്‌കോര്‍ സമ്മാനിച്ചത്.അവി ബരോട്ട്, ചേതേശ്വര്‍ പൂജാര എന്നിവര്‍ അര്‍ദ്ധ സെഞ്ച്വറി നേടിയിരുന്നു. നേരത്തെ, ഗുജറാത്തിനെ പരാജയപ്പെടുത്തിയാണ് സൗരാഷ്ട്ര ഫൈനലിലേക്ക് യോഗ്യത നേടിയത്. രണ്ട് ഇന്നിംഗ്‌സുകളിലുമായി 10 വിക്കറ്റ് വീഴ്‌ത്തിയ പേസര്‍ ജയദേവ് ഉനദ്കട്ടിന്റെ തകര്‍പ്പന്‍ പ്രകടനമാണ് സൗരാഷ്‌ട്രക്ക് ഫൈനലിലേക്ക് യോഗ്യത നേടിക്കൊടുത്തത്.
