കൊറോണ വൈറസ് പ്രതിരോധത്തിനായി രാജ്യം പൂര്ണ്ണമായി ലോക്ക് ഡൗണ് പ്രഖ്യാപിച്ചിരിക്കുകയാണ്. ലോക്ക് ഡൗണ് നിര്ദ്ദേശങ്ങള് ലംഘിച്ച് പുറത്തിറങ്ങുന്നവര്ക്കെതിരെ കര്ശന നടപടികളാണ് പൊലീസ് സ്വീകരിച്ചിരിക്കുന്നത്. സര്ക്കാര് നിര്ദ്ദേശങ്ങള് പാലിക്കാതെ പുറത്ത് കറങ്ങി നടക്കുന്നവര്ക്കെതിരെ കേസുകള് രജിസ്റ്റര് ചെയ്യുകയും അവരെ അറസ്റ്റ് ചെയ്യുകയുമാണ് പൊലീസ്. നിയമ ലംഘകര്ക്ക് ലഭിക്കാവുന്ന ശിക്ഷകള് എന്തൊക്കെയാണെന്ന് നോക്കാം.
ഇന്ത്യന് ശിക്ഷാ നിയമം 1860
1. വകുപ്പ് 188
സര്ക്കാര് ഉദ്യോഗസ്ഥരുടെ നിര്ദ്ദേശങ്ങള് അനുസരിക്കാതിരിക്കുന്നതും നിയന്ത്രണങ്ങള് അവഗണിക്കുന്നതും ഒരു മാസം മുതല് ആറു മാസം വരെ തടവ് ലഭിക്കാവുന്നതോ 200 രൂപ മുതല് 1000 രൂപ വരെ പിഴ ഈടാക്കാവുന്നതോ ആയ കുറ്റമാണ്.
2. വകുപ്പ് 269
പൊതുജനാരോഗ്യത്തിനും ജീവനും ഭീഷണിയാകുന്ന രോഗ പകര്ച്ചയ്ക്ക് കാരണമാകുന്ന വിധം അശ്രദ്ധയോടെ പെരുമാറുന്നത് ആറു മാസം വരെ തടവോ പിഴയോ രണ്ടും ഒരുമിച്ചോ ലഭിക്കാവുന്ന കുറ്റമാണ്.
3. വകുപ്പ് 270
പൊതുജനാരോഗ്യത്തിനും ജീവനും ഭീഷണിയാകുന്ന രോഗ പകര്ച്ചയ്ക്ക് കാരണമാകുന്ന വിധം മനപ്പൂര്വ്വം പെരുമാറുന്നത് രണ്ട് വര്ഷം വരെ തടവ് ലഭിക്കാവുന്ന കുറ്റമാണ്.
4. വകുപ്പ് 271
വാഹന ഗതാഗതം നിയന്ത്രിക്കുന്ന അധികൃതരുടെ നിര്ദ്ദേശങ്ങള് ലംഘിക്കുന്നതും അസുഖം പടര്ന്ന സ്ഥലത്ത് നിന്നും മറ്റൊരു സ്ഥലത്തേക്കുള്ള സഞ്ചാരത്തിനുള്ള വിലക്ക് ലംഘിക്കുന്നതും 6 മാസം വരെ തടവോ പിഴയോ രണ്ടും ഒന്നിച്ചോ ലഭിക്കാവുന്ന കുറ്റമാണ്.
5. വകുപ്പ് 176
സര്ക്കാര് ഉദ്യോഗസ്ഥര് നടത്തുന്ന വിവര ശേഖരണത്തിനും നോട്ടീസുകള്ക്കും കൃത്യമായി ഉത്തരം നല്കാനുള്ള വ്യക്തികളുടെ നിയമപരമായ ഉത്തരവാദിത്വത്തെ കുറിച്ച് പരാമര്ശിക്കുന്നു. ഇക്കാര്യത്തില് വീഴ്ച്ച വരുത്തിയേക്കാവുന്ന പ്രത്യാഘാതത്തിന്റെ ഗൗരവം അനുസരിച്ച് ഒരു മാസം മുതല് അറ് മാസം വരെ തടവോ 500 രൂപ മുതല് 1000 രൂപ വരെ പിഴയോ രണ്ടും ഒന്നിച്ചോ ലഭിക്കാവുന്നതാണ്.
6. വകുപ്പ് 177
രോഗ ലക്ഷണങ്ങള് മറച്ചു വെച്ച് മനപൂര്വ്വം തെറ്റായ വിവരങ്ങള് അധികൃതരെ ധരിപ്പിച്ചാല് ആറു മാസം വരെ തടവോ 500 മുതല് 1000 രൂപ വരെ പിഴയോ രണ്ടും ഒന്നിച്ചോ ലഭിക്കാവുന്നതാണ്.
7. വകുപ്പ് 277
രോഗബാധിതര് മനപ്പൂര്വ്വം പൊതുജലാശയത്തിലോ ജലസംഭരണികളിലോ പകര്ച്ചാവ്യാധി പടരും വിധം പെരുമാറുന്ന സാഹചര്യം ഒഴിവാക്കാനും ഇന്ത്യന് ശിക്ഷാ നിയമം ശ്രദ്ധിക്കുന്നുണ്ട്. കുറ്റക്കാര്ക്ക് 3 മാസം വരെ തടവോ 500 രൂപ പിഴയോ രണ്ടും കൂടിയോ ചുമത്തും.
8. വകുപ്പുകള് 153 A, 504, 505(1) (b)
തെറ്റായ വിവരങ്ങള് പ്രചരിപ്പിച്ച് സമൂഹത്തിലെ വിവിധ ജാതി, മത, ഭാഷ, പ്രദേശിക വിഭാഗങ്ങള് തമ്മില് സ്പര്ദ്ധ വലര്ത്തുന്നതും സമാധാനാന്തരീക്ഷം തകര്ക്കുന്നതുമെല്ലാം ഈ വകുപ്പുകള് പ്രകാരം പരമാവധി മൂന്ന് വര്ഷം വരെ തടവും പിഴയും നല്കാവുന്ന കുറ്റങ്ങളാണ്.
