ന്യൂഡൽഹി: രാജ്യത്തെ കൊറോണ പ്രതിരോധ പ്രവർത്തനങ്ങൾക്ക് സഹായവുമായി ഇന്ത്യൻ ഫുട്ബോൾ ടീം. ഇതിനായി പ്രധാനമന്ത്രിയുടെ ദുരിതാശ്വാസ നിധിയിലേക്ക് വെളിപ്പെടുത്താത്ത ഒരു തുകയാണ് ഫുട്ബോൾ ടീം സംഭാവനയായി നൽകിയിരിക്കുന്നത്. നായകൻ സുനിൽ ഛേത്രിയാണ് ഇക്കാര്യം അറിയിച്ചത്.
‘രാജ്യം എല്ലായ്പ്പോഴും ഞങ്ങൾ കൊടുക്കുന്നതിനേക്കാൾ കൂടുതലായി തിരിച്ചു നൽകാറുണ്ട്. അതിനാൽ രാജ്യത്തിന് സഹകരണം ആവശ്യമായ ഈ സാഹചര്യത്തിൽ ദേശീയ ടീമിലെ കളിക്കാർ എല്ലാവരും ചേർന്ന് പ്രധാനമന്ത്രിയുടെ ദുരിതാശ്വാസ നിധിയിലേക്ക് ഒരു തുക സംഭാവന ചെയ്തിരിക്കുന്നു’. ഛേത്രി ട്വിറ്ററിൽ കുറിച്ചു.
തങ്ങളുടെ സംഭാവന കൂടുതൽ ആളുകൾക്ക് പ്രചോദനമാകുമെന്ന് പ്രതീക്ഷിക്കുന്നതായും ഈ സാഹചര്യത്തിൽ എല്ലാവരും ഒരുമിച്ച് ഉണ്ടാകുമെന്നും ഛേത്രി പറഞ്ഞു. ഇന്ത്യൻ ടീമിന്റെ ലോകകപ്പ് യോഗ്യത മത്സരങ്ങൾ മാർച്ചിലും ജൂണിലുമായി നടക്കാനിരിക്കുകയായിരുന്നു. എന്നാൽ കൊറോണ വൈറസ് വ്യാപനത്തിന്റെ പശ്ചാത്തലത്തിൽ മത്സരങ്ങൾ മാറ്റി വെച്ചിരിക്കുകയാണ്.