ന്യൂഡല്ഹി: രാജ്യത്ത് കൊറോണയ്ക്കെതിരായ പോരാട്ടത്തിൽ പങ്കുചേർന്ന് ഹോക്കി ഇന്ത്യയും. പ്രധാനമന്ത്രിയുടെ ദുരിതാശ്വാസ നിധിയിലേക്ക് 25 ലക്ഷം രൂപ ഹോക്കി ഇന്ത്യ സംഭാവന ചെയ്തു. പ്രതിസന്ധി ഘട്ടത്തില് രാജ്യം ഒറ്റക്കെട്ടായി നില്ക്കുകയും സഹായം നല്കുകയും ചെയ്യേണ്ട സമയമാണെന്ന് ഹോക്കി ഇന്ത്യ പ്രസിഡന്റ് മുഹമ്മദ് മുഷ്താഖ് അഹമ്മദ് പറഞ്ഞു.
ഹോക്കിക്ക് എല്ലായിപ്പോഴും രാജ്യത്തെ ജനങ്ങളില്നിന്നും സ്നേഹവും പിന്തുണയും ലഭിച്ചിട്ടുണ്ട്. അതുകൊണ്ടുതന്നെ രാജ്യത്തെ സഹായിക്കേണ്ടത് തങ്ങളുടെ ഉത്തരവാദിത്വമാണെന്ന് മുഹമ്മദ് മുഷ്താഖ് അഹമ്മദ് വ്യക്തമാക്കി. കഴിഞ്ഞ ദിവസം ഇന്ത്യൻ ഫുട്ബോൾ ടീമും പ്രധാനമന്ത്രിയുടെ ദുരിതാശ്വാസ നിധിയിലേക്ക് സംഭാവന ചെയ്തതായി അറിയിച്ചുരുന്നു.
നേരത്തെ, ബിസിസിഐ 51 കോടി രൂപയാണ് പ്രതിരോധ പ്രവർത്തനങ്ങൾക്കായി സംഭാവന നൽകിയത്. ഇതിനു പുറമെ ഗുസ്തി ഫെഡറേഷന് ഓഫ് ഇന്ത്യയ്ക്കു വേണ്ടി ബ്രിജ് ഭൂഷണ് സിങ് 11 ലക്ഷം രൂപയും ടെന്നീസ് രംഗത്തു നിന്നും സാനിയ മിർസ 1.2 കോടി രൂപയും സംഭാവനയായി നൽകിയിരുന്നു.