മുംബൈ: കൊറോണയില്‍ പ്രാദേശിക ക്രിക്കറ്റ് മത്സരങ്ങളടക്കം നിശ്ചലമായതോടെ മുംബൈയിലെ അമ്പയര്‍മാര്‍ക്കും സാങ്കേതിക പ്രവര്‍ത്തകര്‍ക്കും സഹായമൊരുക്കി അമ്പയര്‍മാരുടെ സംഘടനയും മുംബൈ ക്രിക്കറ്റ് അസോസിയേഷനും സംയുക്തമായി രംഗത്ത്.
ഏറ്റവുമധികം പ്രാദേശിക ക്രിക്കറ്റ് മത്സരങ്ങളും ജില്ലാ മത്സരങ്ങളും ക്ലബ്ബുകളുമുള്ള മുംബൈയില്‍ ഇതുമായി ബന്ധപ്പെട്ട് പ്രവര്‍ത്തിക്കുന്ന നൂറിലധികം ജീവനക്കാര്‍ തൊഴിലില്ലാതെ കഷ്ടപ്പെടുകയാണെന്ന് സംഘടന വിലയിരുത്തി. കടുത്ത സാമ്പത്തിക പ്രതിസന്ധിയാണ് പലരും അനുഭവിക്കുന്നത്. ഇതില്‍ പ്രാദേശിക അമ്പയര്‍മാര്‍, സ്‌ക്കോര്‍ എഴുതുന്നവര്‍, ഗ്രൗണ്ട് നന്നാക്കുന്നവര്‍ അടക്കം നിരവധി പേരുണ്ടെന്നും എംസിഎ ഭാരവാഹികള്‍ അറിയിച്ചു.
ഒരു കൂട്ടം മുതിര്‍ന്ന അമ്പയര്‍മാരാണ് സാമ്പത്തിക ശേഖരണം നടത്തിയിരിക്കുന്നത്.ക്രിക്കറ്റുമായി ബന്ധപ്പെട്ടവരോടും ഉദാരമായി സംഭാവനകള്‍ സ്വീകരിച്ചതോടെ ഇതുവരെ രണ്ടര ലക്ഷം രൂപ സ്വരൂക്കൂട്ടാനായെന്നും എംസിഎ അറിയിച്ചു. നിലവില്‍ എല്ലാവര്‍ക്കും 3000 രൂപ വീതം ആശ്വാസധനമായി നല്‍കുമെന്നും എംസിഎ പറഞ്ഞു. ഇതുവരെ 47 അമ്പയര്‍മാര്‍ക്കും 15 സ്‌ക്കോറര്‍ മാര്‍ക്കും സഹായധനം വിതരണം ചെയ്തു.
