ലോസെയ്ന്: അന്താരാഷ്ട്ര ഒളിമ്പിക്സ് കമ്മിറ്റി യോഗ്യത നേടേണ്ട തീയതി നീട്ടി. അടുത്ത വര്ഷത്തേക്ക് മാറ്റിവച്ച ടോക്കിയോ ഒളിമ്പിക്സിനായി കായികതാരങ്ങള്ക്ക് യോഗ്യത നേടാനുള്ള അവസാന തീയതി 2021 ജൂണ് 29 ആക്കിയാണ് പുതുക്കി നിശ്ചയിച്ചിരിക്കുന്നത്. കൊറോണ ലോകംമുഴുവന് വ്യാപിച്ച സാഹചര്യത്തിലാണ് ചരിത്രത്തിലാദ്യമായി രോഗഭീതി മൂലം ഒളിമ്പിക്സ് മാറ്റിവക്കേണ്ടിവന്നത്. ഒളിമ്പിക്സ് കമ്മിറ്റിക്കുവേണ്ടി രാജ്യാന്തര ചുമതലയുള്ള ജെയിംസ് മക്ലോഡാണ് വിവരം അറിയിച്ചത്.
ഒളിമ്പിക്സിലേക്കുള്ള രാജ്യങ്ങളുടെ പ്രവേശനം തീരുമാനിക്കുന്ന അനുമതി പത്രം നല്കേണ്ട അവസാന തീയതി 2021 ജൂലൈ 5 ആക്കി നിശ്ചയിച്ചിട്ടുണ്ട്. ഇതിനൊപ്പം രാജ്യങ്ങള്ക്ക് അവരുടെ താരങ്ങളുടെ ദേശീയ യോഗ്യത തീരുമാനിക്കുന്ന തീയതി ജൂണ് 29ന് മുന്നേയാക്കാമെന്നും കമ്മിറ്റി നിര്ദ്ദേശിച്ചിട്ടുണ്ട്. 2021ല് ജൂലൈ 23 മുതല് ആഗസ്റ്റ് 8 വരെയാണ് ഒളിമ്പിക്സ് ജപ്പാനിലെ ടോക്കിയോവില് നടത്താന് പുതുക്കിയ തീയതിയായി തീരുമാനിച്ചിട്ടുള്ളത്.
രാജ്യാന്തര തലത്തില് കൊറോണ ബാധ രൂക്ഷമായിരിക്കേ ഗ്രീസില് നിന്നും പരമ്പരാഗതമായ ദീപശിഖാ പ്രയാണം കഴിഞ്ഞ മാസം ആരംഭിച്ചെങ്കിലും നിര്ത്തിവച്ചിരുന്നു. തുടര്ന്ന് ജപ്പാനിലേക്ക് വിമാനത്തിലെത്തിയ ദീപം ജപ്പാനിലെ ഒളിമ്പിക്സ് കമ്മിറ്റി ഏറ്റുവാങ്ങി സൂക്ഷിച്ചിരിക്കുകയാണ്. ഒളിമ്പിക്സ് അടുത്ത വര്ഷത്തേക്ക് മാറ്റിയതിനാല് ദീപശിഖാ പ്രയാണ ചടങ്ങുകള് വീണ്ടും പുതുതായി നടക്കുമോ എന്ന കാര്യം തീരുമാനമായിട്ടില്ല.