ജലന്ധര്: കൊറോണ പ്രതിരോധ പ്രവര്ത്തനത്തിനായി ക്രിക്കറ്റ് താരങ്ങളായ യുവരാജ് സിംഗും ഹര്ഭജന് സിംഗും സംഭാവനകള് നല്കി. യുവരാജ് സിംഗ് 50 ലക്ഷം രൂപ പി.എം.കെയറിലേക്ക് നല്കിയപ്പോള് സഹതാരം ഹര്ഭജന് സിംഗ് 5000 കുംടുംബങ്ങള്ക്ക് റേഷന് നല്കിയാണ് വ്യത്യസ്തനായത്.
ഞായറാഴ്ചയാണ് യുവരാജ് സിംഗ് കൊറോണ പ്രതിരോധത്തിനായുള്ള തന്റെ സംഭാവന നല്കി മറ്റ് താരങ്ങള്ക്കൊപ്പം ചേര്ന്നത്. ഇന്ത്യന് ക്രിക്കറ്റിലെ സ്ഫോടനാത്മകമായ ബാറ്റ്സ് മാനും ഓള്റൗണ്ടറുമായിരുന്നു യുവി. അന്താരാഷ്ട്ര ക്രിക്കറ്റില് നിന്നും സ്വയം വിരമിച്ച താരം നിലവില് ഐപിഎല്ലിലാണ് ശ്രദ്ധ കേന്ദ്രീകരിച്ചിരിക്കുന്നത്. യുവിക്കൊപ്പം ഇന്നലെ വാര്ത്തയിലിടം നേടിയത് ഇന്ത്യന് സ്പിന് കരുത്തായി അറിയപ്പെട്ട ഹര്ഭജന് സിംഗാണ്. കളിക്കളത്തിലെ ടര്ബനേറ്റര് എന്ന വിളിപ്പേരുള്ള ഹര്ഭജനും ഭാര്യ ഗെറ്റാ ബസ്രയും ചേര്ന്നാണ് 5000 കുടുംബങ്ങള്ക്ക റേഷന് സംവിധാനം നല്കി മാതൃകയായത്.
കഴിഞ്ഞ ദിവസങ്ങളില് ഇന്ത്യന് നായകന് വിരാട് കോഹ് ലിയും ഭാര്യയും നടിയുമായ അനുഷ്ക ശര്മ്മയും ചേര്ന്ന് പി.എം. കെയറിലേക്ക് സംഭാവന നല്കിയിരുന്നു. ഇവര്ക്ക് മുന്നേ തന്നെ സച്ചിനും രോഹിത് ശര്മയും സംഭാവന നല്കിയിരുന്നു. തന്റെ 80 ലക്ഷം വിഹിതത്തില് രോഹിത് 50 ലക്ഷം രൂപ പി.എം.കെയറിലേക്കും 25 ലക്ഷം മുഖ്യമന്ത്രിയുടെ നിധിയിലേക്കും 5 ലക്ഷം തെരുവു നായ്ക്കള്ക്കുള്ള ഭക്ഷണ വിതരണത്തിനും നല്കി.
