ലിസ്ബണ്: കായിക ലോകത്ത് പുതിയ ലോക റെക്കോർഡ് കുറിക്കാനൊരുങ്ങി പോർച്ചുഗീസ് സൂപ്പർ താരം ക്രിസ്റ്റിയാനോ റൊണാൾഡൊ. വരുമാനത്തിൽ 100 കോടി ഡോളർ ക്ലബ്ബിലെത്തുന്ന ആദ്യ ഫുട്ബോള് താരമെന്ന റെക്കോഡാണ് റോണോയെ കാത്തിരിക്കുന്നത്. ഫോബ്സാണ് ഇക്കാര്യം വ്യക്തമാക്കിയിരിക്കുന്നത്.
യുവന്റസില് നിന്നുള്ള പ്രതിഫലയിനത്തില് 497 കോടിയാണ് റൊണാള്ഡോ കൈപ്പറ്റുന്നത്. പരസ്യയിനത്തില് 338 കോടിയാണ് താരത്തിന്റെ സമ്പാദ്യം. കഴിഞ്ഞ വര്ഷം വാര്ഷിക വരുമാനമായി റൊണാൾഡൊ കൈപ്പറ്റിയത് 830 കോടിയായിരുന്നു. കൊറോണ വൈറസ് ബാധയെ തുടര്ന്ന് 32 കോടി രൂപയോളം റൊണാള്ഡോയുടെ വേതനയിനത്തില് യുവന്റസ് കുറച്ചിരുന്നെങ്കിലും അദ്ദേഹത്തിന്റെ റെക്കോഡിലേക്കുള്ള പ്രയാണത്തിന് ഇത്
തടസമാവില്ലെന്നാണ് ഫോബ്സിന്റെ റിപ്പോർട്ട് വ്യക്തമാക്കുന്നത്.
ക്ലബ്ബ് പ്രതിഫലയിനത്തില് ലയണല് മെസിയാണ് റൊണാള്ഡോയെക്കാള് മുന്നില്. എന്നാല് പരസ്യവരുമാനത്തിൽ റൊണാൾഡോയാണ് മുന്നിൽ. ഗോള്ഫ് ഇതിഹാസ താരം ടൈഗര് വുഡ്സ്(2009), ബോക്സിംഗ് താരം ഫ്ളോയിഡ് മെയ് വെതര്(2017) എന്നിവരാണ് 100 കോടി ഡോളര് ക്ലബ്ബിലെത്തിയ മറ്റ് കായിക താരങ്ങള്.