ന്യൂഡൽഹി: ക്രിക്കറ്റ് ലോകം കണ്ട എക്കാലത്തെയും മികച്ച താരം ആരെന്ന് വെളിപ്പെടുത്തി മുൻ ഓസ്‌ട്രേലിയൻ നായകൻ മൈക്കൽ ക്ലാർക്ക്. താൻ കണ്ടതിൽ വെച്ച് ഏറ്റവും മികച്ച ഏഴ് ബാറ്റ്‌സ്മാന്മാരെ ക്ലാർക്ക് അടുത്തിടെ തെരഞ്ഞെടുത്തിരുന്നു. ഇതിനിടെയാണ് ഏറ്റവും മികച്ച ബാറ്റ്സ്മാൻ ആരാണെന്ന കാര്യവും ക്ലാർക്ക് തുറന്നു പറഞ്ഞിരിക്കുന്നത്.
സച്ചിൻ ടെണ്ടുൽക്കർ, റിക്കി പോണ്ടിംഗ്, ജാക് കാലിസ്, ബ്രയാൻ ലാറ, രാഹുൽ ദ്രാവിഡ്‌, കുമാർ സംഗക്കാര എന്നീ പ്രതിഭാ ശാലികളായ ഒരുപിടി കളിക്കാരുടെ കാലഘട്ടത്തിൽ കളിച്ചിട്ടുള്ള വ്യക്തിയാണ് ക്ലാർക്ക്. എന്നാൽ ബലഹീനതകൾ ഇല്ലാത്ത ഒരേയൊരു ബാറ്റ്സ്മാൻ സച്ചിൻ ടെണ്ടുൽക്കർ ആണെന്നാണ് മൈക്കൽ ക്ലാർക്ക് ഇപ്പോൾ വെളിപ്പെടുത്തിയിരിക്കുന്നത്. സച്ചിനെ പുറത്താക്കാൻ വളരെ ബുദ്ധിമുട്ടാണെന്നും അദ്ദേഹം എന്തെങ്കിലും പിഴവ് വരുത്താനായി കാത്തിരുന്നിട്ടുണ്ടെന്നും ക്ലാർക്ക് പറയുന്നു.
‘ഞാൻ കണ്ടിട്ടുള്ളതിൽ വെച്ച് ഏറ്റവും സാങ്കേതിക തികവുള്ള ബാറ്റ്സ്മാൻ സച്ചിനാണ്. പുറത്താക്കാൻ ഏറ്റവും ബുദ്ധിമുട്ടേറിയ കളിക്കാരനാണ് സച്ചിൻ. സാങ്കേതികപരമായി അദ്ദേഹത്തിന് ബലഹീനതകൾ ഇല്ല. അദ്ദേഹത്തിന് പിഴവ് സംഭവിക്കാൻ കാത്തിരിക്കണം’. ക്ലാർക്ക് പറഞ്ഞു.
അതേസമയം, ഇന്നത്തെ കാലത്ത് ഏറ്റവും മികച്ച ബാറ്റ്സ്മാൻ ഇന്ത്യൻ നായകൻ വിരാട് കോഹ്‌ലിയാണെന്നും ക്രിക്കറ്റിന്റെ മൂന്ന് വിഭാഗങ്ങളിലും കോഹ്‌ലി നേടിയ റെക്കോർഡുകൾ വളരെയേറെ അതിശയിപ്പിക്കുന്നതാണെന്നും ക്ലാർക്ക് പറഞ്ഞു. സെഞ്ച്വറികൾ നേടുന്ന കാര്യത്തിൽ സച്ചിനും കോഹ്‌ലിയും സമന്മാരാണെന്നും അദ്ദേഹം കൂട്ടിച്ചേർത്തു.
