പോസ്റ്റ് ഓഫീസ് വഴി ബാങ്കിലെ തുക എത്തിക്കല്‍, സംസ്ഥാന തല സംവിധാനം പൂര്‍ത്തിയായി

തിരുവനന്തപുരം: ബാങ്ക് അക്കൗണ്ടിലെ പണം  തപാല്‍ വകുപ്പ് വഴി ആവശ്യക്കാരന്റെ വീട്ടുപടിക്കലെത്തിക്കാനുള്ള ഒരുക്കങ്ങള്‍ പൂര്‍ത്തിയായി. ക്ഷേമപെന്‍ഷനും സ്‌കോളര്‍ഷിപ്പും ഉള്‍പ്പെടെയുള്ളവ ലോക്ക്ഡൗണ്‍ കാലത്ത് ബാങ്കുകളില്‍ എത്താതെതന്നെ കൈപ്പറ്റാവുന്ന പദ്ധതിയക്കാണ് തുടക്കമായത്. ചീഫ് പോസ്റ്റ് മാസ്റ്റര്‍ ജനറല്‍ ഓഫീസില്‍ നിന്നാണ് പദ്ധതി നിയന്ത്രിക്കുന്നത്. ആധാറും മൊബൈല്‍ നമ്പറും ബന്ധിപ്പിച്ചിട്ടുള്ള ഏതു ബാങ്ക് അക്കൗണ്ടില്‍ നിന്നും പണം ഇത്തരത്തില്‍ പോസ്റ്റ് ഓഫീസില്‍ വിളിച്ചാല്‍ പോസ്റ്റുമാന്‍ മുഖേന വീട്ടിലെത്തിക്കും.

ഇതിനായി ഉപഭോക്താവിന് വേണ്ടത് ബാങ്ക് അക്കൗണ്ടുമായി ബന്ധിപ്പിച്ചിട്ടുള്ള മൊബൈല്‍ ഫോണും ആധാര്‍ നമ്പരും മാത്രമാണ്. വീട്ടിലെത്തുന്ന തപാല്‍ ജീവനക്കാരനോട് മൊബൈല്‍ നമ്പര്‍ പറയുക. ശേഷം ലഭിക്കുന്ന ഒ.ടി.പി അദ്ദേഹവുമായി പങ്കിടുക. തുടര്‍ന്ന് ബയോമെട്രിക് സ്‌കാനിംഗ് വഴി ഉപഭോക്താവിനെ തിരിച്ചറിഞ്ഞ് പണം കൈമാറും.
ലോക്ക്ഡൗണ്‍ കാലയളവില്‍ ശാരീരിക അകലം പാലിക്കേണ്ടതിനാല്‍ ബാങ്കിലോ എ.ടി.എമ്മിലോ പോകാതെ ആവശ്യാനുസരണം പണം ലളിതമായി പിന്‍വലിക്കാന്‍ ഉപഭോക്താവിന് ഇത് പ്രയോജനപ്പെടും. ഈ സേവനം സൗജന്യമായാണ് കേന്ദ്രസര്‍ക്കാര്‍ തീരുമാനിച്ചിരിക്കുന്നത്.

ബയോമെട്രിക് ഉപകരണം ഉപയോഗിക്കവേ തപാല്‍ ജീവനക്കാര്‍ ഹാന്‍ഡ് സാനിറ്റൈസര്‍, മാസ്‌ക്, മറ്റ് വ്യക്തിഗത സംരക്ഷണ ഉപകരണങ്ങള്‍ എന്നിവ ഉപയോഗിച്ചുള്ള മുന്‍കരുതലുകള്‍ സ്വീകരിക്കണമെന്നും നിര്‍ദ്ദേശിച്ചിട്ടുണ്ട്. വീടുകളില്‍ വരുമ്പോള്‍ ഗുണഭോക്താക്കളും സാമൂഹിക അകലം പാലിക്കാന്‍ ശ്രദ്ധിക്കണം. പണം പിന്‍വലിക്കാനുള്ള ആവശ്യം നിറവേറ്റാനായി ഉപഭോക്താക്കള്‍ക്ക് അടുത്തുള്ള ഹെഡ് പോസ്റ്റ് ഓഫീസുമായോ ഓരോ തപാല്‍ ഡിവിഷനിലും പ്രവര്‍ത്തിക്കുന്ന ഹെല്‍പ്പ് ലൈനുമായോ ബന്ധപ്പെടണം. തപാല്‍ വകുപ്പിന്റെ അനുബന്ധ സ്ഥാപനമായ ഇന്ത്യാ പോസ്റ്റ് പേമെന്റ് ബാങ്ക് സംവിധാനത്തിലൂടെയാണ് പണം തപാല്‍ വകുപ്പ് നല്‍കുന്നത്.

പദ്ധതിയുടെ സുഗമമായ നടത്തിപ്പിനായി സംസ്ഥാനത്തെ വിവിധ പോസ്റ്റല്‍ ഡിവിഷനുകളുടെ ഹെല്‍പ്പ്‌ലൈന്‍ നമ്പരുകള്‍ തപാല്‍വകുപ്പ് നല്‍കിയത് ഇതിനൊപ്പം ചേര്‍ക്കുകയാണ്. തിരുവനന്തപുരം നോര്‍ത്ത്: 0471-2464814, 2464794, തിരുവനന്തപുരം സൗത്ത്: 0471-2471654, കൊല്ലം: 0474-2760463, തിരുവല്ല: 0469-2602591, പത്തനംതിട്ട: 0468-2222255,
ആലപ്പുഴ: 0477-2251540, ആലുവ: 0484-2620570, ചങ്ങനാശ്ശേരി: 0481-2424444,
എറണാകുളം: 0484-2355336, ഇടുക്കി: 0486-2222281, ഇരിങ്ങാലക്കുട: 0480-2821626,
കോട്ടയം: 0481-2582970, മാവേലിക്കര: 0479-2302290, 2303293, തൃശ്ശൂര്‍: 0487-2423531, പാലക്കാട്: 0491-2544740, ഒറ്റപ്പാലം: 0466-2222404, തിരൂര്‍: 0494-2422490, മഞ്ചേരി: 0483-2766840, കോഴിക്കോട്: 0495-2386166, വടകര: 0496-2523025, തലശ്ശേരി: 0490-2322300, 7907272056, കണ്ണൂര്‍: 0497-2708125, കാസര്‍കോട്: 04994-230885