തിരുവനന്തപുരം: ലോകമെമ്പാടും വ്യാപിച്ചു കൊണ്ടിരിക്കുന്ന കൊറോണ വൈറസ് എന്ന മഹാമാരിക്കെതിരെ പോരാടുകയാണ് നമ്മളെല്ലാവരും. നമ്മുടെ സുരക്ഷയ്ക്കായി രാപകലില്ലാതെ സേവനമനുഷ്ഠിക്കുകയാണ് രാജ്യത്തെ പൊലീസ് ഉദ്യോഗസ്ഥരും ആരോഗ്യ പ്രവര്ത്തകരുമെല്ലാം. നമുക്ക് വേണ്ടിയാണ് ഇവര് സേവനം അനുഷ്ഠിക്കുന്നതെങ്കിലും രാജ്യത്തിലെ ചില ഭാഗങ്ങളിലെങ്കിലും ഇവര് ആക്രമിക്കപ്പെടാറുണ്ട്. ഇത്തരത്തിലുള്ള വാര്ത്തകള് നാം അറിയാറുമുണ്ട്.
എന്നാല് അതില് നിന്നൊക്കെ വ്യത്യസ്തമായ ഒരു വാര്ത്തയാണ് ഇപ്പോള് സാമൂഹ്യ മാദ്ധ്യമങ്ങളില് വൈറലാകുന്നത്. വിവാഹ നാളില് പൊലീസ് ഉദ്യോഗസ്ഥര്ക്ക് സദ്യ വിളമ്പുന്ന വരനും വധുവുമാണ് ഈ വാര്ത്തയിലെ ശ്രദ്ധാ കേന്ദ്രം. തിരുവനന്തപുരത്താണ് സംഭവം. തിങ്കളാഴ്ച്ചയാണ് ഇവര് വിവാഹിതരായത്. വര്ക്കല സ്വദേശിയായ ആര്യയാണ് വധു. വരന് വര്ക്കല വാച്ചര്മുക്ക് സ്വദേശി വിവേക്.
വര്ക്കല പൊലീസ് സ്റ്റേഷനിലെ പൊലീസുകാര്ക്കാണ് ഇവര് സദ്യ ഒരുക്കിയത്. കൊറോണ വൈറസ് വ്യാപിക്കുന്ന സാഹചര്യത്തില് കരുതല് നടപടികളുടെ ഭാഗമായി രാപകല്ലില്ലാതെ ജോലി ചെയ്യുന്ന പൊലീസ് ഉദ്യോഗസ്ഥര്ക്ക് സദ്യ വിളമ്പി കൊണ്ട് ഇവര് വിവാഹ ചടങ്ങുകള് പൂര്ത്തിയാക്കിയത്. വളരെ ലളിതമായ ചടങ്ങോടെയായിരുന്നു വിവാഹം. വളരെ കുറച്ച് പേര് മാത്രമാണ് വിവാഹത്തില് പങ്കെടുത്തത്. വിവാഹ ശേഷം ഇവര് സദ്യയുമായി പൊലീസ് സ്റ്റേഷനിലെത്തി. സദ്യയ്ക്ക് ശേഷം കേക്ക് മുറിച്ച് മധുരം കഴിച്ച ശേഷമാണ് ഇവര് മടങ്ങിയത്. സാമൂഹ്യ മാദ്ധ്യമങ്ങളില് ഇതിനോടകം തന്നെ ഇവരുടെ ദൃശ്യങ്ങള് വൈറലായി കഴിഞ്ഞു. നിരവധി പേര് ഇവരെ അഭിനന്ദിച്ച് രംഗത്തെത്തുകയും ചെയ്തു.
