ഇവര്‍ എന്റെ കുടുംബാംഗം തന്നെയാണ്; ഇത് എന്റെ കടമയും; വീട്ടു ജോലിക്കാരിയുടെ മരണാനന്തര കര്‍മ്മങ്ങള്‍ നിര്‍വ്വഹിച്ച് ഗൗതം ഗംഭീര്‍

ന്യൂഡല്‍ഹി: അസുഖം മൂലം മരിച്ച വീട്ടു ജോലിക്കാരിയുടെ മരണാനന്തര കര്‍മ്മങ്ങള്‍ ചെയ്ത് മുന്‍ ഇന്ത്യന്‍ ക്രിക്കറ്റ് താരവും ബിജെപി എംപിയുമായ ഗൗതം ഗംഭീര്‍. ആറു വര്‍ഷമായി ഗൗതം ഗംഭീറിന്റെ വീട്ടില്‍ ജോലിയ്‌ക്ക് നിന്നിരുന്ന സരസ്വതി പത്ര എന്ന സ്ത്രീയുടെ മരണാനന്തര കര്‍മ്മങ്ങളാണ് ഗംഭീര്‍ ചെയ്തത്. തന്റെ കുഞ്ഞുങ്ങളെ നോക്കുന്ന അവര്‍ തനിക്കൊരു വീട്ടു ജോലിക്കാരിയല്ലെന്നും തന്റെ കുടുംബാംഗമാണെന്നും ഗൗതം ഗംഭീര്‍ ട്വിറ്ററില്‍ കുറിച്ചു. അവരുടെ മരണാനന്തര കര്‍മ്മങ്ങള്‍ ചെയ്യുന്നത് തന്റെ കടമയാണെന്നും അദ്ദേഹം വ്യക്തമാക്കി.

ജാതിയിലോ മതത്തിലോ വിശ്വാസത്തിലോ പദവിയിലോ അല്ല ഒരാളുടെ മഹത്വമുള്ളതെന്നാണ് താന്‍ വിശ്വസിക്കുന്നതെന്നും അദ്ദേഹം പറഞ്ഞു. അതാണ് നല്ല സമൂഹം കെട്ടിപ്പടുക്കാനുള്ള മാര്‍ഗമെന്ന് വിശ്വസിക്കുന്നതായും ഇന്ത്യയെ കുറിച്ചുള്ള തന്റെ ആശയവും ഇതാണെന്നും അദ്ദേഹം കൂട്ടിച്ചേര്‍ത്തു.

കൊറോണ വൈറസ് വ്യാപനം തടയാനായി രാജ്യത്ത് ലോക്ക് ഡൗണ്‍ പ്രഖ്യാപിച്ചിരിക്കുന്നതിനാല്‍ ഇവരുടെ മൃതദേഹം ജന്മനാടായ ഒഡീഷയിലേക്ക് കൊണ്ടു പോകാന്‍ കഴിഞ്ഞിരുന്നില്ല. ഈ സാഹചര്യത്തിലാണ് ഇവരുടെ മരണാനന്തര കര്‍മ്മങ്ങള്‍ ഗൗതം ഗംഭീര്‍ നിര്‍വ്വഹിച്ചത്. പ്രമേഹത്തിനും രക്തസമ്മര്‍ദ്ദത്തിനും കഴിഞ്ഞ ഏതാനും ദിവസങ്ങളായി ചികിത്സയിലായിരുന്ന ഇവര്‍ ചൊവ്വാഴ്‌ച്ചയാണ് മരിച്ചത്.

Taking care of my little one can never be domestic help. She was family. Performing her last rites was my duty. Always believed in dignity irrespective of caste, creed, religion or social status. Only way to create a better society. That’s my idea of India! Om Shanti pic.twitter.com/ZRVCO6jJMd

— Gautam Gambhir (@GautamGambhir) April 23, 2020