ന്യൂഡല്‍ഹി: തന്റെ ക്രിക്കറ്റ് ജീവിതത്തിലെ മറക്കാത്ത അനുഭവങ്ങള്‍ പങ്കുവെച്ച് മുന്‍ ഇന്ത്യന്‍ താരം ഗൗതം ഗംഭീര്‍. സൗരവ് ഗാംഗുലി, മഹേന്ദ്ര സിംഗ് ധോണി എന്നീ ഇതിഹാസ നായകന്‍മാര്‍ക്ക് കീഴില്‍ കളിച്ചെങ്കിലും ഗംഭീര്‍ മികച്ച നായകനായി തെരഞ്ഞെടുത്തിരിക്കുന്നത് വ്യത്യസ്തനായ ഒരു കളിക്കാരനേയാണ്. അദ്ദേഹത്തിനു വേണ്ടി തന്റെ ജീവന്‍ നല്‍കാനും തയ്യാറായിരുന്നു എന്നാണ് ഗംഭീര്‍ പറഞ്ഞത്.
ഗംഭീര്‍ കളി ആരംഭിച്ചത് ഗാംഗുലിക്ക് കീഴിലായിരുന്നെങ്കിലും ഏറ്റവും കൂടുതല്‍ മത്സരങ്ങള്‍ കളിച്ചത് ധോണിക്കു കീഴിലായിരുന്നു. രാഹുല്‍ ദ്രാവിഡ്, വിരാട് കോഹ്‌ലി എന്നിവര്‍ക്കു കീഴിലും അദ്ദേഹം കളിച്ചിട്ടുണ്ടെങ്കിലും വളരെ ചെറിയ കാലത്ത് ഇന്ത്യയെ നയിച്ച അനില്‍ കുബ്ലെയെയാണ് ഗംഭീര്‍ മികച്ച നായകനായി തെരഞ്ഞെടുത്തത്.
2016ലാണ് ഇന്ത്യന്‍ നായകനായി കുംബ്ലെ നിയമിക്കപ്പെട്ടത്. 14 ടെസ്റ്റ് മത്സരങ്ങളിലാണ് കുംബ്ലെ ഇന്ത്യയെ നയിച്ചത്. 2008ല്‍ നടന്ന ഓസ്‌ട്രേലിയന്‍ പര്യടനമാണ് ഗംഭീര്‍ മറക്കാത്ത അനുഭവമായി പങ്കുവെച്ചത്. അക്കാലത്ത് ഇന്ത്യന്‍ ടീമിലെ തന്റെ സ്ഥാനം പോലും സംശയത്തിന്റെ വക്കിലായിരുന്നു എന്നും ഗംഭീര്‍ പറഞ്ഞു. പരമ്പരക്ക് മുന്നോടിയായി കുംബ്ലെയുമൊത്ത് ഡിന്നര്‍ കഴിച്ചപ്പോള്‍ അദ്ദേഹം പറഞ്ഞ വാക്കുകള്‍ ഇന്നലത്തെ എന്നപ്പോലെ ഇന്നും മനസിലുണ്ടെന്ന് ഗംഭീര്‍ വ്യക്തമാക്കി.
എന്തു സംഭവിച്ചാലും സേവാഗും നിങ്ങളുമായിരിക്കും ഇന്ത്യയുടെ ഓപ്പണര്‍മാര്‍ എന്നും നിങ്ങള്‍ എട്ട് മത്സരങ്ങളില്‍ പൂജ്യത്തിനു പുറത്തായാലും അതില്‍ മാറ്റമില്ലെന്നും ഡിന്നറിനിടെ കുംബ്ലെ പറഞ്ഞു. തന്റെ കരിയറില്‍ മുന്‍പ് ഒരാളില്‍ നിന്നും അത്തരം വാക്കുകള്‍ കേട്ടിട്ടില്ലെന്നും ആര്‍ക്കെങ്കിലും വേണ്ടി തന്റെ ജീവന്‍ കൊടുക്കേണ്ടി വന്നാല്‍ അത് അനില്‍ കുംബ്ലെക്കു വേണ്ടി ആയിരിക്കുമെന്നും ഗംഭീര്‍ പറഞ്ഞു.
നാല് മത്സരങ്ങളടങ്ങിയ പരമ്പരയില്‍ ഗംഭീര്‍ ഇരട്ട സെഞ്ച്വറി നേടിയിരുന്നു. കുംബ്ലെ തന്നില്‍ അര്‍പ്പിച്ച വിശ്വാസമാണ് ഈ നേട്ടത്തിന് കാരണമായി ഗംഭീര്‍ ചൂണ്ടിക്കാട്ടിയത്. അതേസമയം, കുംബ്ലെ ദീര്‍ഘ കാലം ഇന്ത്യയെ നയിച്ചിരിന്നെങ്കില്‍ അദ്ദേഹത്തിന് നിരവധി റെക്കോര്‍ഡുകള്‍ സൃഷ്ടിക്കാന്‍ സാധിക്കുമായിരുന്നെന്ന് പറഞ്ഞ ഗംഭീര്‍, കുംബ്ലെയുടെ ബൗളിംഗ് മികവിനേയും പ്രശംസിച്ചു.
