ന്യൂഡല്ഹി: ക്രിക്കറ്റില് നിന്നും വിരമിക്കല് പ്രഖ്യാപിച്ച ശേഷം വീണ്ടും കളിക്കത്തിലേക്ക് തിരികെ എത്തിയ നിരവധി പ്രമുഖ കളിക്കാരുണ്ട്. കാള് ഹൂപ്പര്, ഇമ്രാന് ഖാന്, കെവിന് പീറ്റേഴ്സണ്, ജാവേദ് മിയാന്ദാദ് എന്നിവരൊക്കെ കളി മതിയാക്കിയെങ്കിലും വീണ്ടും കളിക്കളത്തിലേക്ക് മടങ്ങിയെത്തിയവരാണ്. എന്നാല്, അത്തരത്തില് ഒരു മടങ്ങിവരവിന് താനും തയ്യാറാണെന്ന് മുന് ഇന്ത്യന് ഓള് റൗണ്ടര് ഇര്ഫാന് പഠാന് പറഞ്ഞു.
തനിക്ക് ഒരു വര്ഷം തരാമെങ്കില് കളിക്കളത്തിലേക്ക് മടങ്ങി എത്തും. അതിനായി തന്റെ ഹൃദയവും ആത്മാവും വരെ സമര്പ്പിക്കാന് തയ്യാറാണെന്നും സെലക്ഷന് കമ്മിറ്റിയുമായുള്ള ആശയവിനിമയം ഇക്കാര്യത്തില് നിര്ണായകമാണെന്നും ഇര്ഫാന് പഠാന് വ്യക്തമാക്കി. സുരേഷ് റെയ്നയുമായി നടത്തിയ ഇന്സ്റ്റഗ്രാം ലൈവിലാണ് പഠാന് മനസു തുറന്നത്.
19-ാം വയസിലാണ് ഇര്ഫാന് പഠാന് ഇന്ത്യന് ടീമിലെത്തിയത്. 2003ല് ഇന്ത്യയുടെ ഓസ്ട്രേലിയന് പര്യടനത്തില് അരങ്ങേറ്റം കുറിച്ച പഠാന് 29 മത്സരങ്ങളില് നിന്നും 100 വിക്കറ്റുകള് സ്വന്തമാക്കിയിരുന്നു. 2006ല് പാകിസ്താനെതിരെ നേടിയ ഹാട്രിക് പ്രകടനം ഏറെ ശ്രദ്ധേയമായി. 31.57 റണ്സ് ശരാശരിയില് ഒരു സെഞ്ച്വറി ഉള്പ്പെടെ 1,105 റണ്സും പഠാന് സ്വന്തം പേരില് കുറിച്ചിട്ടുണ്ട്.
120 ഏകദിന മത്സരങ്ങളില് നീലക്കുപ്പായമണിഞ്ഞ ഇര്ഫാന് പഠാന് 1,544 റണ്സും 173 വിക്കറ്റുകളും സ്വന്തമാക്കിയിട്ടുണ്ട്. 24 ട്വന്റി20 മത്സരങ്ങളില് നിന്നും 28 വിക്കറ്റുകള് വീഴ്ത്തിയ അദ്ദേഹം ഇന്ത്യ പ്രഥമ ട്വന്റി20 കിരീടത്തില് മുത്തമിട്ട 2007ല് കലാശപ്പോരാട്ടത്തിലെ കളിയിലെ താരമായും തെരഞ്ഞെടുക്കപ്പെട്ടിരുന്നു.